بلوچ آجوئی لوٹوکیں سروک رھیم بلوچ ایڈوکیٹ ءَ ماں رسانکدر ءَ وتی شنگ کرتگیں درشانے ءَ گوشتگ که بلوچ راجی رھشون واجه واھد بکش بلوچ ( استاد واھد کمبر ) ءُ مھمود الی لانگو ءِ آوار جنگ ءُ زوربیگواھی ءَ یک سالے سرجم بیتگ۔
آئی ءَ گوشتگ که استاد واھد کمبر 19 جولائی 2024 ءَ چه ایران ءِ شھر کرمان ءَ همے وڑ ءَ مھمود الی لانگو چه اوگانستان ء شھر نیمروز ءَ 18 جون 2024 ءَ پاکستان ءِ چیریں ادارھاں آوار جتگ ءُ بیگواه کرتگ اَنت ، اے دوئیں بلوچ رھشونانی زوربیگواھی ءَ یک سالے سرجم بیتگ ءُ آیانی زوربیگواھی ءِ زمه وار ریاست پاکستان آیانی امیدگس ءَ پیش کنگ ءُ میارانی پدر کنگ ءَ بے سوب اِنت۔
آئی ءَ گوشتگ که اگاں توانمندیں پاکستان ھمے سرپد بیت که گوں زوربیگواھی ، پوجی آپریشن ءُ درکانودی کوش ءِ پیمیں درکانودی ، رستری ءُ میارباری کاروائی ءُ ھیلھاں بلوچ ءِ آجوئی زرمبشت ءَ پروش دات کنت گڑا ریاست ءِ اے پگر نه تھنا آئی ءِ مزنیں ردی یے ءُ راجدپتر ءِ نابزانتی یے بلکیں اے شوندات انسانیت ءِ بگیری ءَ یک میارباری اِنت۔
رھیم بلوچ ءَ گوشتگ که پوجی آپریشن ، زوربیگواهی، درکانودی کوشاں ھوار ریاستی ناشرکاری ءِ آدگه ھیلھ ، سیاسی ءُ جمھوری کاراں ھوار رسانکدر ، انسانی بنکی آجوئی ءُ ھکانی سر ءَ بندش جنگ ءِ پیمیں زوراکی ھلیھانی کارمرز کنت ءُ زورگریں ریاست ھزاراں گیش مردماں بندیگ کنگ ، کشت ءُ کوش بے گس کرت کنت بلے بلوچ راج ءِ راجی آجوئی ءِ توکل ءُ جوزگ ءَ بندیگ یا کشت کرت نه کنت۔ چہ پاکستان ءِزورگپتی ءَ آجوئی یک واھشت یا شوکے نہ اِنت بلکیں راجی آجوئی ءَ بلوچ وتی راجی پدریچ، شرپ، دودمان، وشھالی ءُ دیمروئی ءِ مانزمان ءُ آئی شریں وڑے ءَ سرپد بیت۔
آئی ءَ گوشتگ که واجه واهد کمبر ءَ داں شست سال ءَ گیش گوں وتی بت دروریں جھد ءَ بلوچ راجی آجوئی ءِ لیکھ ءَ داتگ ءُ ھما چراگ بالینتگ کہ آئی زانشت ءِ رژنائی پہ کید ءُ بند کنگ، کشت ءُکوش ءَ زورگریں ریاست پاکستان ءَ ھوار کسی وس ءِ کارے نہ اِنت۔
رھیم بلوچ ایڈوکیٹ ءَ گوشتگ کہ واجہ گلام مھمد بلوچ، نواب مھمد اکبر ھان بگٹی، ڈاکٹر منان بلوچ، بانک کریمہ بلوچ ءِ وڑیں راجی رھشونانی شھیدی، نواب ھیربکش مری ءُ سردار اتا اللہ ھان مینگل ءِ وڑیں رھشونانی روگ، ڈاکٹر ھالد بلوچ،نواب زادگ بالاچ مری، سھادت مری ءُ جنرل اسلم بلوچ ءِ وڑیں کماندارانی شھیدی بی ایس او ءِ سروک زاھد کرد، زاکر مجید ءُ شبیر بلوچ ءِ وڑیں ورنائیں رھشوناں ھوارھزارانی کچ ءَ بلوچ ورنایانی زوریں بیگواھیءَ آجوئی زرمبشت نہ نزور بیتگ ءُ نہ اوشتاتگ ، نہ چہ آیانی یل داتگیں جاہ ءَآجوئی زرمبشت ءِ گام سست بوتگ۔ گڑا دژمن بزانت کہ استاد واھد کمبر بلوچ ءُ مھمود لانگو ءَ ھوار چونیں ھم رھشونے ءِ زوریں بیگواھی ءَ ایمن بوت نہ کنت۔
