اسلام آباد : بلو چ یکجھتی کمیٹی ءِ بندیگیں سروک ءُ زور بیگواھیں مردمانی کھولاں زھرشانی ءِ چارمی روچ ءَ پولیس اسلام آباد پریس کلب ءِ نیمگءَ روگ ءَ نیلگ ءَ اِنت۔
پولیس ءَ پریس کلب ءِ نیمگ ءَِ روکیں دگانی سر ءَ ٹٹ جتگ ءُ زھرشانی کنوکیں مردم پریس کلب ءِ نیمگ ءَ روگ ءَ نہ اشتگ اَنت۔ سانمندیں کھول دگ ءِ سر ءَ نشتگ ءُ زھرشانی کنگ ءَ اَنت۔
اے بابت ءَ زھرشانی کنوکیں مردمانی گوشگ اِنت کہ ما چہ بلوچستان ءَ ھزارانی کچ ءَ کلو میٹر سپر کرتگ ءُ پہ انساپ ءِ لوٹ ءَ اسلام آباد ءَ اتکگ ایں۔ مارا کسانیں زھگ ءُ پیرزال ھمراہ اَنت۔ مرچی پریس کلب ءِ کر ءُ کشاں بازیں کچے ءَ پولیس کارمند آرگ بیتگ انچو گمان کنگ بیتگ کہ پولیس مئے سر ءَ ارش کنت۔
آیانی گوشگ اِنت کہ ما ناشرکار نہ ایں بس پہ وتی آزیزانی آجوئی ءَ لوٹ کنگ ءَ اد ءَ اتکگ ایں۔ مارا ھمے گوشگ بہ بیت کہ مئے مردم کج ءَ اَنت کہ آ درکانودی آوار جنگ بیتگ اَنت۔
آیاں گوں سول سوسائٹی، انسانی ھکانی گل، اھوالکار ءُ گوں وکیلاں لوٹ کرتگ کہ آ بیا اَنت ءُ مئے گون ءَ توار چست بہ کن اَنت ءُ پہ ریاستی زوراکیانی گر ءُ دار کنگ ءَ مارا کمک بہ کن اَنت۔
آیانی گوشگ اِنت کہ گوستگیں سے روچ اِنت اسلام آباد پولیس ءَ مارا ٹینٹ جنگ نہ اشتگ ءُ مرچی درسیں راہ بند کنگ بیتگ اَنت۔ زھرشانی کنگ مئے راھبندی ھک اِنت ءُ نوں ھمے اچما پلگ بوگ ءَ اِنت۔ ریاست مارا ھمے بہ گوش ایت کہ نوں بلوچ ءَ را زاناں توار چست کنگ ءِ موکل نیست۔
