اسلام آباد ءَ پہ بی وائی سی ءِ سروکانی ناھکیں بند کنگ ءُ زور بیگواھیں بگیری ءَ برجاھیں زھرشانی نندانک ءَ پاکستان ءِ نامداریں اھوالکار ھامد میر ءَ گپ جتگءُ گوشتگ کہ اگاں بلوچستان یا ھیبرپکتوانواہ ءُ کج ءَ ھم ناشرکاری یے بیت ما آئی ءَ ایرجن ایں۔ اگاں ریاست کسے ءَ انساپ دات نہ کنت آ ھم ناشرکاری یے ما آئی ءَ ھم ایر جن ایں۔
ھامد میر ءَ گوشتگ کہ اے گپ تچک اِنت گاں پاکستان ءِ تہ ءَ راھبند ءُ کانود ءَ واک بہ بوتیں گڑا جیڑہ گیش ءُ گیوار بوت اَنت چونیں ھم زھرشانی یے بوگ ءَ اِنت آ کانود ءُ راھبند ءِ ھساب ءَ بوگ ءَ اَنت۔ اے پرایمنیں زھرشانی ءِ مول ھمیش اِنت کہ مئے گون ءَ نا انساپی بوگ ءَ اِنت۔
آئی ءَ گوشتگ کہ کسے زھرشانی کنت یا گوں زھرشانی کنوکاں توار چست کنت آ ھم ھمے گوشگ بیت کہ اے ناشرکارے۔ اگاں من ھامد میر مرچی اد ءَ زھرشانی ءََ نشتگ ءُ گپ کنگ ءَ آں من ءَ ھم ھمے گوشگ بیت کہ ھامد پہ ھما بیگواھیں مردماں نشتگ ءُ گپ جنگ ءَ اِنت کہ آ بلوچستان ءَ ناشرکاری کنگ ءَ اَنت۔
ھامد میر ءَ زور بیگواھیں جھانزیب مھمد ھسنی ءِ زھگ ءِ بابت ءَ گوشتگ کہ اے زھگ منی کش ءَ نشتگ ایشی پس چہ 2016 ءَ بیگواہ اِنت، اے زھگ انگت ءَ نہ زانت کہ ایشی پت ءِ دروشمے چونیں بوتگ۔ چے اے زھگ ءِ گون ءَ اے وڑ بوگ ءَ اِنت ایش ناشرکاری یے نہ اِنت۔
آئی ءَ گوشتگ کہ اد ءَ دو پیمیں ناشرکاری پمشکا بوگ ءَ اِنت کہ ڈیھ ءِ راھبند ءِ سر ءَ کار بوگ ءَ نہ اِنت۔ اگاں ڈیھ ءِ راھبند ءِ ھساب ءَ کار کنگ بہ بیت گڑا جیڑہ گیش ءُ گیوار بنت۔
