
نیشنل ڈیموکریٹک پارٹی ءِ جارکش ءَ وتی شنگ کرتگیں درشانے ءَ بارکان ءَ گل ءِ بنجاھی آرگنائزنگ کمیٹی ءِ باسک سنگت سنا بلوچ ءِ گس ءَ پاکستانی پوج ءِ درکانودی بیڑ برگ ، چادر ءُ چاردیوالءِ پادمال کنگ ءُ آئی ءِ زوربیگواه کنگ ءِ جھد گوں ترندیں دانکاں ایر جتگ ءُ گوشتگ که اے کاروائی انسانی ھکانی ءُ ریاست ءِ رھبندانی سرجم ءَ بگیری اِنت.
آئی ءَ گوشتگ که اے وھد ءَ گوں وشبھتی ءَ سنگت سنا بلوچ گس ءَ ساڑی نه بیتگ بلے داں باز اداراں ریاستی کارمند گس ءَ ساڑی بیتگ اَنت ، آیاں گس ءِ مردم آزار داتگ اَنت کتاباں ھوار بازیں چیزے پل اِتگ ءُ پروشتگ ، ما ھمے سرپد به ایں که کاروائی سنگت سنا بلوچ ءِ زور بیگواہ کنگ ءِ بے سوبیں جھد اِنت ، چه ایشی ءَ ابید بارکان ءِ آدگه ھنداں ھم زوربیگواھی ءِ ھال اِنت ، اے وڑیں کاروائیانی پارست ءَ ریاستی اداره کانودی رھبندانی جاه ءَ گوں زور ءَ سیاسی کارکناں بے توار کنگ اَنت۔
جارکش ءَ گوشتگ که نیشنل ڈیموکریٹک پارٹی یک جمھوری ءُ سیاسی گلے که لس مردمانی میان ءَ اِنت ءُ په راھبندی ، کار ءُ باری ، چاگردی ءُ راجی ھکاں جھد ءَ اِنت ، ما کانود ءِ سروکاں ھمے دلجمی ءَ دے ایں که اگاں کسے ءِ سر ءَ بھتامے ھست آ کانود ءِ رد ءَ آمیدگس ءَ پیش کنگ به بنت گڑا ما انتزامیه ءُ پولیس ءَ هر وڑ ءَ ھمراه به ایں ، اگاں اَبید ءِ چونیں ایپ آئی آر ، بیھار ءُ کانودی موکل ءَ اے وڑیں کاروائی کنگ به بیت نه تھنا ایشی ایر جن ایں بلکیں ایشی بگیری ءَ جھد کن ایں۔
این ڈی پی ءَ درشان ءِ گڈی ءَ لوٹ کرتگ ءُ گوشتگ که اے ویل ءِ بابت ءَ تچک ءَ پٹ ءُ پول کنگ به بیت ، چه کھول ءَ پھلی لوٹگ به بیت ءُ سیاسی کارکنانی تُرسینگ ءِ درچ بند کنگ به بیت ، این ڈی پی وتی ایمن ءُ راھبندی جھد ءَ برجاه دار ایت ءُ اے پیمیں ھر وڑیں درکانودی کارانی بگیری ءَ توار چست کنت۔