بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ نواب نوروز ھان ءِ ھمبلانی پاھو ءِ روچ ءِ درگت ءَ وتی شنگ کرتگیں درشانے ءَ گوشتگ کہ 15 جولائی 1960 ءِ شھیداں کرآن مجید ءِ نام ءَ رد وارتگ بلے آیانی توکل ءَ پروش نہ وارتگ۔
آئی ءَ گوشتگ کہ مرچی اے رنجیگیں روچ ءِ درگت ءَ ما نواب نوروز ھان ءِ ھمبلانی گون ءَ ریاست ءِ دروگبندی ءُ شھیدی ءَ یاد کن ایں۔ میر بٹے ھان، بھاول ھان، مستی ھان، گلام رسول ءُ سبزل ھان آ 15 جولائی 1960 ءَ پاکستان ریاست ءَ ھیدر آباد زندانءَ پاھو داتگ اَنت۔
ڈاکٹر نسیم بلوچ ءَ گوشتگ کہ آیاں اے جنگ ءَ پروش نہ وارتگ بلکیں ایمنی ءِ نام ءِ سر ءَ رد دیگ بیتگ اَنت۔ پاکستان ءِ پوج ءَ کرآن زرتگ ءُ آئی شرپ ءِ سوگند وارتگ کہ اگاں بلوچ چہ کوہ ءَ ایر بہ کپ اَنت ءُ گپ ءُ تران بہ کن اَنت آیاں ھچ وڑیں تاوان نہ دے ایں۔ آیاں ھدا ءِ زبان ءِ سر ءَ توپک ایر کرتگ اَنت بلے ایشی جاہ ءَ آگوں سانکلاں بندیگ کنگ ءُ مرگ ءِ سزا دیگ بیتگ اَنت۔ وھدے کہ آ پاھو دیگ ءِ جاہ ءَ اوشتوک بیتگ اَنت آ یاں گوں پھر ءُ گڈی دلپدردیں لوٹ ءَ گوشتگ کہ کران پاک ءَ ھم مئے گون ءَ پاھو بدے چی ءَ کہ آئی ءِ گون ءَ دروگ بندگ بیتگ۔
آئی ءَ گوشتگ کہ آیاں گوں ھمے گوانک ءَ وتی پاھو پہ مدامی گھگیری ءَ مٹ کرتگ۔ آیاں زوراک ءِ گداری پاشک کرتگ ءُ چہ وتی جھد ءِ برورد ءَ بلوچ راج ءِ شرپ، آجوئی ءُ وتواکی ءِ سر برز کرتگ۔
بلوچ نیشنل موومنٹ ءِ چیئرمین ءَ گوشتگ کہ پنچ سال ءَ پد 25 دسمبر 1965 ءَ بلوچ گھگیری ءِ نود سالی ئیں چیدگ نواب نوروز ھان زندان ءَ بیران بیتگ۔
ڈاکٹر نسیم بلوچ ءَ گوشتگ کہ مرچی ما آیاں ستک شانی ندر کن ایں، آیانی دیمونی بلوچستان ءِ ارواہ ءِ سر ءَ نکش اِنت۔ آیانی توار بلوچستان ءِ ھمک کنڈ ءَ جسکگ ءَ اِنت۔ آیانی توکل پہ مئے راجی جھد ءِ راہ ءَ رژن تالان کنت۔
