بلوچ لبریشن آرمی ( بی ایل اے ) ءِ جارکش آزاد بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که یازده جولائی ءِ شپ ءِ اَدار نو ءَ مئے سرمچاراں کلات ءِ ھند دشت گوران ءَ شال کراچی ءِ شھدگ بند کرتگ ، سرمچاراں په دمگ ءِ دستیگ کنگ ءُ دارگ ءَ مزنیں شھدگ ءَ پٹ ءُ پول بندات کرتگ که اے داں شپ ءِ یک ءَ برجاه بیتگ.
آئی ءَ گوشتگ که ھمے میان ءَ پاکستانی پوج ءَ مئے دستیگ کرتگیں دمگ ءَ پُترگ ءِ جھد کرتگ که سرمچاراں چه جتائیں نیمگاں آیانی سر ءَ اُرش کرتگ ، سرمچار ءُ پاکستانی پوج ءِ میان ءَ میڑ داں دیر ءَ برجاه بیتگ که ایشی آسر ءَ پوج پدکنزگ ءَ لاچار بیتگ۔
جارکش ءَ گوشتگ که اے میڑ ءِ آسر ءَ دژمن ءِ دو کارمند مرتگ ءُ سے ٹپی بیتگ۔
آئی ءَ گوشتگ که ھمے وڑ ءَ سرمچاراں گدان ھوٹل ءِ نزیک ءَ لٹ ءُ پلی شرکت ھم نشانگ کرتگ که ایشی آسر ءَ بازیں کچے ءَ مشین ءُ گاڑی تاوان داتگ اَنت.
آزاد بلوچ ءَ درشان ءِ گڈی ءَ گوشتگ که اے جنگ ءِ داں آجو ءُ وتواجھیں بلوچستان ءِ گرگ ءَ برجاه دارگ ءِ کول ءَ کن ایں۔
