بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں سوراب ءِ ھند گدر ءَ زورگریں پاکستانی پوج ءِ مزنیں بنجل ءِ سر ءَ سوبمندیں اُرشے کرتگ ءُ بنجل ءِ دو بھر سرجم ءَ دستیگ کرتگ ، اُرش ءِ میان ءَ یک کواڈ کاپٹرے ھم جتگ ءُ تباه کرتگ ، په زورگریں پاکستانی پوج ءَ کمک ءَ آھوکیں کاروان ھم نشانگ کرتگ اَنت ، اِے میڑاں دژمن ءِ سرجم ءَ 18 کارمند مرتگ ءُ ھمے وڑ ءَ بی ایل اے ءِ پتھ اسکواڈ ءِ یک سرمچارے ھارون بلوچ پنام ءِ دوستین شھید بیتگ۔
آئی ءَ گوشتگ که ھمے وڑ ءَ سرمچاراں پنجگور ، بلیده ءُ مچ ءَ دگه سے اُرشاں پاکستانی پوج ، آئی ءِ راشن بروکیں گاڑی ءُ چریک نشانگ کرتگ اَنت۔
جارکش ءَ گوشتگ که دوشی ادار ءِ یازده ءِ نزیک ءَ سرمچاراں سوراب ءِ ھند گدر ءَ پاکستانی پوج ءِ مزنیں بنجل ءِ سر ءَ چه دو نیمگ ءَ اُرش کرتگ ، داں یک ادارے ءَ گیش برجاھیں میڑاں سرمچاراں بنجل ءِ دو بھر دستیگ کرتگ ، سیمی بھر ءِ دستیگ کنگ ءِ جھد ءَ سرمچار ھارون بلوچ پنام ءِ دوستین شھید بیتگ۔
آئی ءَ گوشتگ که اِے میڑ ءَ زورگریں پوج ءِ کم چه کم یازده کارمند مرتگ ءُ دگه بازیں بزدلیں کارمند ءَ وتی سنگت یل داتگ اَنت ءُ چه جنگ ءِ پڑ ءَ تتکگ اَنت ، سرمچاراں چه بنجل ءَ سلاه ءُ تراکناکیں شوره ھم دستیگ ، ھمے میان ءَ دژمن ءِ یک کواڈ کاپٹرے ھم سرمچارانی تیرگواری ءَ تباه بیتگ که اُرش ءِ وھد ءَ په چاریگی ءَ کارمرز کنگ بیتگ۔
جارکش ءَ گوشتگ که زورگریں پوج ءِ په کمک ءَ دیم داتگیں پنچ گاڑیانی ھواریں کاروانے سرمچاراں سنگر گپتگ ءُ سوراب ءِ نزیک ءَ نشانگ کرتگ که ایشی آسر ءَ دو گاڑی تباه بیتگ ءُ پوج پدکنز بوگ ءَ لاچار بیتگ۔
آئی ءَ گوشتگ که ایشی ءَ پد چه پوج ءِ نیمگ ءَ دوازده گاڑیانی ھواریں دگه یک کاروانے ءَ دیم ءَ آھگ ءِ جھد کرتگ که سرمچاراں گوں چیر کرتگیں شورھاں نشانگ کرتگ ، تراک ءِ آسر ءَ دژمن ءِ یک گاڑی یے سرجم ءَ تباه بیتگ ءُ دومی ءَ ھم تاوان بیتگ ، اے اُرش ءَ دگه 7 کارمند مرتگ ءُ کم چه کم یازده ٹپی بیتگ۔
جارکش ءَ گوشتگ که مرچی پنجگور ءِ ھند سوراپ ءَ سی پیک دگ ءَ دژمن ءِ کاروان ءِ سر ءَ دگه یک بمب اُرشے کنگ بیتگ ، اے اُرش ءِ آسر ءَ زورگریں پوج ءِ یک کارمندے مرتگ ءُ سے پهی بیتگ ھمے وڑ ءَ گاڑی ءَ سکا تاوان بیتگ .
آئی ءَ گوشتگ که بلیده ءَ بی ایل اے ءِ سرمچاراں دژمن ءِ راشن بروکیں دو گاڑی راشنانی ھواری ءَ گپتگ ، ھمے وڑ ءَ مچ ءَ زورگریں پوج ءِ چریک ابدالگپار ء ھاجی ابدالجبار راجپوت گوں دستی بمب ءَ نشانگ کرتگ که ایشی آسر ءَ آ سکا ٹپی بیتگ ، نشانگ کنگ بیتگیں چریک دکاندارے ءِ دروشم ءَ په زورگریں پوج ءَ چاریگی ءُ کمکارے ءَ بیتگ۔
جارکش ءَ گوشتگ که شھید ھارون بلوچ پنام ءِ دوستین ء الی بکش بلگانی نوشکے ءِ ھند کیشنگی بلگانی ءِ جاه منند بیتگ ، آ 2022 ءَ بی ایل اے ءَ هوار بیتگ ، ساری ءَ شھری چیرجنگی ءِ کارانی بھر بیتگ چه ایشی ءَ پد کوه ءَ اتکگ ءُ چه جنگی بودناکی ءِ بنیاد ءَ آ بی ایل اے ءِ پتھ اسکواڈ ءِ بھر جوڑ کنگ بیتگ۔
آئی ءَ گوشتگ که شھید ھارون بلوچ ءَ کلات ءَ شور پارود ،نوشکے ءُ ھاران ءِ سنگراں گل ءِ ٹوھیں کاروائیاں جنگ داتگ ، ھارون بلوچ نه ایوک ءَ شھید یاسین پنام ءِ رئوپ ءِ نزیکیں سنگت بیتگ بلکیں دوئین یک دمگے ءِ جاه منند بیتگ اَنت ، دوئیناں آجوئی ءِ لیکھ چه شھر ءَ بگر داں کوھی سنگراں داشتگ ءُ ھمے لیکھ ءِ ھواری ءَ شھید بیتگ اَنت۔
جیھند بلوچ ءَ درشان ءِ گڈی ءَ گوشتگ که شھید ھارون بلوچ پنام ءِ دوستین ءِ دیمونی راجی جنز ءِ درچ ءِ بھر اِنت که چه گوستگیں پدریچاں برجاھیں گھگیری ءِ چیدگ جوڑ بیتگ ، آئی ءِ شھیدی نه ایوک ءَ بی ایل اے ءِ جنگی توکل ءَ گیشتر توان بکش ایت بلکیں اے دیمونی په بلوچ ورناھاں یک لیکھی چراگے که آجوئی ءِ راه ءَ ھمک دیمونی ءِ منگ ءِ جوزگ ءَ دنت ، زورگریں توانمدانی بگیری ءَ برجاھیں جھد ءَ ھمک شھید ءِ ھون اے جنز ءَ یل نوکیں توانے دنت ءُ اے یک تچکیں کلوه اِنت که بلوچ ءِ سرڈگار ءِ سر ءَ زوراکی ءِ شوربندی گڈی ءَ پروش ءِ آماچ بیت۔
