چہ اسلام آباد ءُ گوادر ءَ پاکستانی پوج ءَ نودربرے ءَ ھوار دو ورنا آوار جتگ ءُ بیگواہ کرتگ۔
بنشون ءِ رد ءَ چہ اسلام آباد ءَ بیگواہ کنگ بیتگیں ورنا ءِ نام سئید ء ابید اللہ اِنت کہ کائد آزم یونیورسٹی ءِ بی ایس ڈیپنس اینڈاسٹریٹجک اسٹڈیز ( DSS ) ءِ پنچمی بھرگ ءِ نودربر اِنت ءُ پنجگور ءِ ھند پروم ءِ جاہ منند اِنت۔ پاکستانی پوج ءَ مرچی بیگاہ ءِ ھپت ءَ چہ اسلام آباد ٹول پلازہ ءَ آوار جتگ ءُ بیگواہ کرتگ۔
آئی زوریں بیگواھی ءِ گپ بلوچ نودربراں راست کرتگ ءُ چہ انسانی ھکانی ادارھاں پہ آئی آجوئی ءَ لوٹ کرتگ۔
ھمے وڑ ءَ چہ گوادر ءِ بلوچ وارڈ نمبر شش ءَ 6 جولائی ءَ پاکستانی پوج ءَ بابل ء رھمت بلوچ نامیں نودربرے آوار جتگ ءُ بیگواہ کرتگ۔
بابل رھمت ءِ زوریں بیگواھی ءِ گپ بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ راست کرتگ ءُ آئی آجوئی ءِ لوٹ کرتگ۔
