بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچستان ءَ انسانی ھکانی نامداریں کارکن ماہ رنگ بلوچ، سبگت اللہ شاہ جی، بیبوبلوچ، گلزادی بلوچ، بیبگر بلوچ ءُ گپار بلوچ تھری ایم پی او ءِ وڑیں ناشریں کانودے ءِ پارست ءَ ناشرکاری ءِ بھتام ءَ دزگیر کنگ بیتگ اَنت۔ اے کارکن سک دیر اِنت کہ بلوچستان ءَ پہ زوریں بیگواھی، درکانودی کوش ءُ ریاستی زوراکیانی بگیری ءَ توار چست کنگ ءَ بیتگ اَنت۔
آئی ءَ گوشتگ کہ ریاستی ادارہ پہ پرایمنیں جھد ءِ دارگ ءَ نوک آبادکاری ءِ ھیلہ ءَ کار گرگ ءَ اِنت۔ چہ ایشاں گیش ترسناک ھمیش اِنت کہ انسانی ھکانی کارکناں ناشرکار لیکگ ءُ آیانی جھد ءَ بنام کنگ ءُ ریاستی زوراکیاں ھک لیکگ ءَ اَنت۔ اے دزگیری نہ تھنا انسانی ھکانی بگیری اِنت بلکیں بلوچستان ء برجاھیں ریاستی ناشرکاریانی منانک اِنت۔
ڈاکٹر نسیم بلوچ ءَ گوشتگ کہ ما گوں میان استمانی تک، اکوام متھدہ، ایمنسٹی انٹر نیشنل، ھیومن رائٹس واچ، یورپی یونین ءُ گوں درسیں انسانی ھکانی گلاں لوٹ کن ایں کہ آ پہ اے دزگیریں کارکنانی زوتیں آجوئی ءَ سرکار ءَ زور بہ دے اَنت۔ بلوچستانءَ پہ انسانی ھکانی ناھکیں لگتمالیانی بابت ءَ پٹ ءُ پول بہ کن اَنت۔پاکستان ءَ بلوچانی بگیری ءَ ریاستی زوراکیءُ جنگی میارباریانی سر ءَ جست بہ کن اَنت۔
بی این ایم ءِ سرکماش ءَ گوشتگ کہ بلوچانی ھک ءُ پر ایمنیں جھد ءِ ناشرکاری لیکگ میارباری یے۔ ایشی بگیری ءَ بے تواری گون انسانیت ءَ گداری یے۔
