بلوچ نیشنل موومنٹ( بی این ایم ) ءِ سرکماش ڈاکٹر نسیم بلوچ ءَ گلزار دوست ءِ آوار جنی ءِ بابت ءَ وتی شنگ کرتگیں درشانے ءَ گوشتگ کہ 6 جولائی ءَ چہ تربت ءَ تربت سول سوسائٹی ءِ سروک گلزار دوست چہ گس ءَ آوارجنگ بیتگ۔ اے زورگپتیں بلوچستان ءَ یک ٹوھیں ویلے ءُ ھمک روچی کسھے۔
آئی ءَ گوشتگ کہ کھول ءِ رد ءَ آ دیم ءَ آرگ بیتگ بلے انگت ءَ آجو نہ اِنت بلکیں پاکستان ءِ وتگڑیں سی ٹی ڈی ءِ دست ءَ اِنت۔ آئی میار تھنا ھمیش اِنت کہ آئی ءَ ھک ءِ گپ جتگ۔ آوار جنگ ءَلھتیں روچ پیش آئی مردمانی مچی ءَ گپ جتگ اَت ءُ اود ءَ آئی ءَ ریاستی زوراکی ءُ بلوچانی رنجانی سر ءَ توار چست کرتگ اَت۔
ڈاکٹر نسیم بلوچ ءَ گوشتگ کہ زورگپتیں بلوچستان ءَ ھک ءِ گپ تھنا دارگ نہ بیت بلکیں میارے لیکگ بیتگ۔ ھما مردم کہ پہ انساپ، شرپ ءُانسانی ھکاں گپ جنت آ تچک ءَ نشاگ کنگءُ آوار جنگ بیتگ ءُ پہ ریاست ءَ ترسے لیکگ بیت۔
آئی ءَ گوشتگ کہ سول سوسائٹیءُ انسانی ھکانی گپ کنوک پہ زانت دارگ بنت۔ گلزار دوست ءِ پیمیں کارکن پہ راستیں گپ جنگ ءَ بندیگ کنگ، آزار دیگ ءُگنتریں زوراکیانی دیمپان کنگ بنت۔
بی این ایم ءِ سرکماش ءَ گوشتگ کہ گلزار دوست سی ٹی ڈی ءِ دست ءَ دیگ پہ دیم ءَ آرگ ءُ انساپ دیگ ءَ نہ بیتگ بلکیں اے ریاستی زوراکیانی دگہ یک دروشمے۔
ڈاکٹر نسیم بلوچ ءَ گوشتگ کہ ما گوں انسانی ھکانی گل،سول سوسائٹی ءُ میان استمانی ادارھاں لوٹ کن ایں کہ آ پہ گلزار دوست ءِ زوتیں آجوئی ءَ لوٹ بہ کن اَنت۔ پاکستان ءَ زوریں بیگواھیانی سر ءَ جست بہ کن اَنت۔ بلوچستان ءَ پہ سول سوسائٹیءِ توار ءِ دارگ ءِ بگیریءَ توار چست بہ کن اَنت۔
آئی ءَ گوشتگ کہ بے تواری زوراکیاں کمک کنت۔ گلزار دوست ءِ جیڑہ یاد کنگی اِنت کہ آجوئی ءِ گپ ءِ سر ءَ پابندی اِنت، بلکیں میان استمان ھم ایشی ھک ءَ دنت۔ اے دگہ زورگپتے ءِ منشا ءَ دیگ نہ بیت۔
