بلوچ اسٹوڈنٹس ایکشن کمیٹی ءِ پنچمی بنجاھی کمیٹی دیوان گل ءِ سرکماش شبیر بلوچ ءِ سروکی ءَ برجم دارگ بیتگ۔ دیوان ءِ بنگپ گل ءِگوستگیں اھوال، نگدکاری، گَل ءِ کار، ھندی ءُ میاں استمانی سیاسی جاورءُ آؤکیں گامگیج بیتگ اَنت۔ دیوان ءِ سرجمیں بُنگپانی سر ءَ دلجمی ءَ گپ ءُ تران ءَ پد آؤکیں گامگیج ءِ بھر ءَ پہ آؤکیں کاراں جتائیں نوکیں پیسلہ زورگ بیتگ۔
دیوان ءِ اولی بُن گپ گوستگیں اھوال بیتگ کہ آئی ءَ بنجاھی مزن کارگشاد ءَ گل ءِ گوستگیں اھوال دیوان ءِ دیم ءَ پیش کرتگ اَنت کہ آیانی تہ ءَ گل ءِ کسان ءُ مزنیں مراگش چوشکہ سباء لٹریری پیسٹیول، زانشتی مراگش ءُ ھنکینی مراگش، ھنکینانی سیاسی چِست ءُ ایراں ھوار آدگہ گل ءِ انتزامی کار ھوار بوتگ اَنت، اشاں ھوار گل ءِ جتائیں کمیٹی لبزانک، رسانکدر، زر ءُ مال، بلوچستان کتاب کاروانءُ بلوچ لٹریسی کیمپئین ءِ اھوال دیوان ءِ دیم ءَ یک یک ءَ پیش کنگ بیتگ اَنت۔
دیوان ءِ دومی بن گپ نگدکاری بیتگ کہ سنگتاں ادارہ ءِ کمی ءُ نزوریانی سر ءَ یک یک ءَ نگد کرتگ ءُ پہ آیانی شر کنگ ءَ نوکیں شور ءُ سلاہ داتگ۔ سنگتاں نگد ءِ سر ءَ تران کرتگ ءُ گوشتگ کہ سیاسی جھد یک سائنسی کارےءُ ھمک سائنسی کارگوں زانت ءُ منانک ءَ بیت، ھمے زانشت اِنت کہ مردماں جیڑگ پرمائیت، ھمے جیڑگ اَنت کہ انسان ءَ گھتری ءُ شرتری ءِ نیمگ ءَ بر اَنت۔ ھمے وڑءَ سیاسی کار ءَ جیڑگ ءَ چہ سیاسی جھدکار وتی تہ ءِ ءُ کش ءُ گور ءِ نزوریانی سر ءَ نگد کُرت کنت ءُ پہ وتی ادارہ ءِ شری ءَ نوکیں شوربندی ٹھینت کنت۔
دیوان ءِ دیمتری بھر گل ءِ کار بوتگ کہ آئی ءِ تہ ءَ گل ءِ سرجمیں ھنکینانی سر ءَ گوں ھیرتی ءَ چمشانک دیگ بوتگ ءُ آیانی کُلیں چِست ءُ ایر ءُ جاورانی سر ءَ دلجمی ءَ گپ ءُ تران کنگ بوتگ۔ چہ ایشی ءَ پد کُلیں بنجاھی سنگتاں وتی پیش نھاد دیوان ءِ دیم ءَ ونتگ اَنت ءُ دیمی کاراں نوکیں شور ءُ سلاہ داتگ۔ گل ءِ کار ءِ سر ءَ سنگتاں تران کرتگ ءُ گوشتگ کہ ادارہ ءَ اے سالانی میان ءَ وت ءَ بلوچستان ءِ ھمک میتگ، ھلک ءُ کوچگ، شھر ءُ ادارھاں سر کنگ ءِ جھد کرتگ ءُ اے جھد ءَ مزنیں کچے ءَ سوبمند بوتگ بلے اے پہ یک آشوبی ادارہ ئے ءَ انگت کم اِنت پرچا کہ سیاسی کار بیھ سرجم نہ بیت بلکیں آ ھمک دور ءُ باریگ ءَ گیش مھکمتر ءُ شرتر بُوْان کنت ءُ دیم ءَ روت۔
دیوان ءِ سرجمیں بنگپانی سرءَ دلجمی ءَ گپ ءُ تران ءَ پد آوکیں گامگیج ءِ تہ ءَ بنجاھی کمیٹی ءَ پہ آؤکیں کاراں نوکیں پیسلہ زُرتگ کہ آیانی تہ ءَ دمگی وانگجاہ ءِ اڈ دیگ، بلوچ نودربر سیاست ءِ سر ءَ مراگش ءَ ھوار رسانکدری، لبزانکی،بلوچ لٹریسی کیمپین ءُ بلوچستان کتاب کاروان ءِ کمیٹیانی پیسلہ ھوار بوتگ اَنت۔
بنجابی کمیٹی ءِ دیوان سرجمیں بنگپانی سر ءَ دلجمی ءَ گپ ءُ تران ءُ آؤکیں گامگیج ءَ نوکیں پیسلھانی زورگ ءَ پدچہ بنجاھی سر کماش ءِ سروکی ءَ دیوان ھلاس کنگ بوتگ۔
