تربت: پاکستانی پوج ءَ سول سوسائٹی کیچ ءِ سروک گلزار دوست آوار جتگ ءُ بیگواہ کرتگ۔
اھوالکار ءِ رد ءَ گلزار دوست تربت ءِ ھند آپسر ءَ وتی گس ءَ بوتگ کمیں پیسر پاکستانی پوج ءَ بیڑ برتگ ءُ گلزار دوست آوار جتگ ءُ بیگواہ کرتگ۔
چہ گلزار دوست ءِ بیگواھی ءِ ھال ءِ ماں رسانکدر ءَ شنگ بوگ ءَ جتائیں بھرگاں سْیادی داروکیں مردم آئی زوریں بیگواھی ءَ ایر جنگ ءَ اَنت۔
چوش کہ گلزار دوست انسانی ھکانی نامی ئیں کارکنے کہ آئی ءَ کیچ ءَ ھوار بلوچستان ءُ چہ بلوچستان ءَ ڈن اسلام آباد ءَ ھم شتگ ءُ ریاستی زوراکیانی بگیری ءَ توار چست کرتگ۔
گلزار دوست چہ ریاستی زوراکیانی بگیری ءَ توار چست کنگ ءِ پژدر ءَ باز بر ءَ ایپ آئی آر ھم کنگ بیتگ۔ باز رند ءَ زھرشانیانی میان ءَ پولیس ءَ دزگیر کرتگ ءُ بندیگ بوتگ۔
