نیشنل ڈیموکریٹک پارٹی ءِ جار کش ءَ جون 2025 ءَ انسانی ھکانی رپورٹ شنگ کرتگ ءُ گوشتگ کہ بلوچستان اے وھد ءَ گون انسانی ھکانی ناگیگیں جاوراں گوزگ ءَ انت۔ چہ زوریں بیگواھیاں بگر دانکہ درکانودی کوش ءَ ایشی ریاستی پوج ءُ آئی جوڑ کرتگیں ھندی کشندہ ٹولی کنگ ءَ اِنت ھرپیمیں زوراکی برجاہ اِنت۔ اے زوراکیانی تہ ءَ دروگیں میڑ، نشانگ کنگ ءُ کشگ، زور بیگواھیں مردمانی کوش ءُ بلیک میل ءِ وڑیں ناشری کنگ بوگ ءَ اِنت۔
آئی ءَ گوشتگ کہ جون 2025 ءَ باز پر ایمنیں زھرشانی کنگ بیتگ کہ ریاست ءَ زوراکی کرتگ ءُ باز مردم دزگیر کنگ بیتگ ۔ شال ءَ گرینڈ الائنس ءِ زھرشانی ءُ کیچ، تربت ءَ سیمسر ءِ بندی ءَ زھرشانی ایشی ءِ دو مسال اَنت کہ اود ءَ پولیس ءَ پہ پر ایمنیں زھرشانیانی ھلاس کنگ ءَ ارسی گیس جتگ ءُ مردم لٹ داتگ ءُ دزگیر کرتگ اَنت ءُ چہ زوراکیاں مردمانی توار ءِ دارگ ءِ جھد کرتگ۔
رپورٹ ءَ گوشگ بیتگ کہ ما دیستگ زوریں بیگواھی ءُ گسانی سر ءَ دستی بمب ارش کنگ ءِ وڑیں ناشریاں جنینانی نشانگ کنگ ءِ جھد کنگ بوگ ءَ اِنت۔ تربت ءَ روبینہ بلوچ ءِ ویل ایشی تچکیں مناک اِنت کہ ریاست ءُ آئی وتگڑیں ادارہ جنیناں ھم ھمے زوراکیانی نشانگ کنگءَ اَنت۔ گوستگیں ماہ مئیءَ ماہ جبین ءِ کیس ءُ چہ آئی ءَ پد اے ماہ ءَ روبینہ ءِ ویل ھمے روچی زوراکیانی بھر اَنت۔
آئی ءَ رپورٹ ءِ گڈسر ءَ جون 2025 ءَ بیتگیں درسیں انسانی ھکانی لگتمالی ءِ رپورٹ پیش کرتگ۔
