چہ ھزدار ءَ بیگواہ کنگ بوتگیں گنی بلوچ ءِ کھول ءَ گوشتگ کہ گنی بلوچ ءِ بیگواھی ءَ ماھے ءَ گیش اِنت نہ آمیدگس ءَ پیش کنگ بوتگ ءُ نہ کہ آئی بابت ءَ مارا سرپدی دیگ بوتگ۔ آئی دزگیری ءِ نہ منّگ ریاستی ادارھانی نیمگ ءَ پاکستان ءِراھبند ءُانسانی ھکانی لگتمالی اِنت۔ گنی بلوچ یک چوناھیں مردمے نہ اِنت بلکیں یک نبشتہ کار، شنگکار ءُ سْیاسی کارکنے۔
کھول ءَ گوشتگ کہ ابدُلگنی بلوچ ءَ مدام پرایمن ءُ ڈیھ ءِ راھبند ءِ رد ءَ وتی ھک لوٹ اتگ۔ ما گنی بلوچ ءِ زوربیگواھی ءِ بگیری ءَ درسیں پورماں توار چست کرتگ، پولیس تانہ ءَ آیپ آئی آر کرتگ، آمیدگس ءَ پٹیش دیگ، گوں انتزامیہ ءَ لوٹ کنگ ءَ ھوار پریس کانپرنس، رسانکدر ءَ کمپین، زھرشانی کرتگ ءُ روانک ھم کش اِتگ۔
آئی گوشتگ کہ شازدہ جون ءَ زھرشانی ءَ ھوار انتزامیہ ءِ کارگس ءَ کیس یاداشت کرتگ۔ ڈپٹی کمشنر ءَ دلجمی داتگ کہ گنی بلوچ ءِ بابت ءَ گوں ھزدار انتزامیہءَ رھوت کن ایں ءُ آئی بابت جست ءُ پرس کناں۔ بلے ایشی ءَ پد گوں کھول ءَ ھچ وڑیں رھوت کنگ نہ بوتگ ءُ گڈی ءَ ما ریاستی ءِ نادزرسی ءِ بگیری ءَ نوشکے سرمل ءَ زھرشانی ءَ شھدگ بند کرتگ۔ اے زھرشانی نندانک ءَ جنین، کماش، ورنا ءُ نودربر، انسانی ھکانی کارکناں ھوار آدگہ مھلوک ءَ بھر زرتگ ءُ ھمے پیش داشتگ کہ گنی بلوچ ءِ بیگواھی تھنا کھول ءِ جیڑہ نہ اِنت چاگرد ءِ تہ ءَ یک مچی سزائے۔
آئی گوشتگ کہ زھرشانی ءِ وھد ءَ بوشکے ءِ اسسٹنٹ کمشنر ءَ یکبرے پد ءَ گوں کھول ءَ گپ ءُ تران کرتگ ءُ شھدگ ءِ پچ کنگ ءِ لوٹ کرتگ۔ ما گپ ءُ تران ءَ پد وتی زھرشانی ھلاس کرتگ۔ بلے ایشی ءَ پد دومی روچ ءَ گوں انتزامیہ ءَ گپ ءُ تران بوت کہ انتزامیہ ءَ مارا دلجمی داتگ کہ اے بابت ءَ گپ ءُ تران بوگ ءَ اِنت دو روچ ءَ گوں جے آئی ٹی ءَ اے کیس ءِ بابت ءَ گپ بیت۔گوں ھزدار انتزامیہ ءُ سرکار ءَ زوت رھوت کن ایں ءُ زوت کھول ءَ گنی ءِ بابت ءَ سرپدی دے ایں۔ بلے انگت چہ نوشکے انتزامیہ ءُ آدگہ سرکاری ادارھانی نیمگ ءَ رھوت کنگ نہ بوتگ۔
کھول ءَ گوشتگ کہ مئے لوٹ تھنا ھمیش اِنت کہ اگاں گنی بلوچ ءِ سر ءَ چونیں بھتامے ھست آمیدگس ءَ پیش کنگ بہ بیت۔ اگاں بے میار اِنت گڑا زوت یل کنگ بہ بیت۔ ما ریاستی ادارہ، سرکار ءُ انسانی ھکانی گل ءَ گوں لوٹ کن ایں کہ آ وتی کرد ءَ پیلو بہ کن اَنت۔
