پنجگور: کشنده ٹولی ءِ دست ءَ کشگ بیتگیں ورنا زیشان زھیر ءِ کوش ءِ بگیری ءَ مرچی پنجگور ءِ ھند ھدابادان ، مواچھ بازار ءَ زھرشانی روانکے کشگ بیتگ۔ روانک چه مواچھ چاراه ءَ بندات بیتگ ءُ داں کھور مانشجاه ، ھدابادان ءَ شتگ۔
روانک ءَ جنین ءُ زھگاں ھوار مردماں بازیں کچے ءَ بھر زرتگ ، زھرشانی کنوکاں بینرز ءُ پلے کارڈ دستاں بیتگ اَنت ءُ آیاں کشنده ٹولی ءُ پاکستانی ریاست ءِ زوراکیانی بگیری ءَ اوگام جتگ ۔
آیاں گوشتگ که ریاست ءُ آئی ءِ جوڑ کرتگیں کشندہ ٹولی ءِ کارمنداں دمگ ءَ مردمانی زندمان جنجال کرتگ۔ ھر روچ بلوچ ءَ ورنا زور بیگواہ کنگ یا ناھک ءَ نشانگ کنگ ءُ کشگ بوگ ءَ اَنت ۔ گون بلوچاں ریاستءِ اے زوراکیانی درچ زوت بند کنگ بہ بیت۔
چوش کہ اے جار چہ بلوچ یکجھتی کمیٹی ءِ نیمگءَ جنگ بیتگ اَت۔ زھرشانی ءَ ھواریں مردماں شھید زیشان زھیر ءِ مانش ءِ سر ءَ بلوچی چادر تالان کرتگ ءُ پل شانتگ۔
