مستونگ: پاکستانی پوج ءِ جوڑ کرتگیں چیریں ادارھانی دستءَ آوار جنگ بوتگیں گلام الی بلوچ ء ابدُلھکیم ءِ گوھار ءَ گوشتگ کہ منی برات چیریں ادارھانی کارمنداں 22 جون 2025 ءَ چہ شال جناہ ٹاؤن ءَ آوار جتگ ءُ بیگواہ کرتگ انگت آئی ھچ ھال نیست کہ چون ءُ کج ءَ اِنت۔ برات ءِ بیگواھی ءَ پد مئے سرجمیں کھول درد ءُ رنجانی آماچ اِنت۔
آئی گوشتگ کہ ما چہ سرکاری ادارہ، آمیدگس ءُ انسانی ھکانی ادارھاں لوٹ کن ایں کہ پہ منی برات گلام الی ءِ آجوئی ءَ توار چست بہ کن اَنت، اگاں آئی سر ءَ چونیں بھتامے ھست آئی ءَ آمیدگس ءَ پیش کنگ ءُ مارا انساپ دیگ بہ بیت۔
آئی گوشتگ چونیں ھم مردمے ءِ زوربیگواھی تھنا انسانی ھکانی لگتمالی نہ اِنت بلکیں درکانودی کارے۔ ما ھمے لوٹ ایں کہ منی برات زوت آجو کنگ بہ بیت۔
