بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که 29 جون ءَ بیگاه ءِ ادار چار ءِ نزیک ءَ بی ایل ایپ ءِ سرمچاراں چاگے ءِ اسٹریٹیجک زون پدگ ، گوک آپ ءَ شال – تپتان ءِ شھدگ بند کرتگ۔ گاڑیانی پٹ ءُ پول کنگ ءِ میان ءَ کسٹم ءِ گاڑی یے داشتگ ، آ دزگیر کرتگ ءُ چه آیاں یک سی تیری یے یک نائن ایم ایم وتاسے پل اتگ۔
آئی ءَ گوشتگ که سرمچاراں جست ءُ پرس ءَ پد یک درملکی کارمندے ءَ ھوار درسیں کارمند مردمگری ءِ بنیاد ءَ کرتگ اَنت۔
جارکش ءَ گوشتگ که سرمچارانی دومی ٹولی ءَ ھمے نزیک ءَ کوه چکی لیویز بنجل ءِ سر ءَ اُرش کرتگ ، لیویز کارمند دزگیر کنگ ءَ پد آیانی سرکاری سلاه پلتگ اَنت ءُ لیویز ءِ بنجل مانداشتگ ءُ تباه کرتگ ، ھمے وڑ ءَ ساڑی ئیں کارمند گوں ھمے دلجمی ءَ یل کرتگ اَنت که آ دیمتر ءَ چه بلوچ راج ءُ ڈروائیورانی مپتیں آزار دیگ ءَ پھریز به کن اَنت۔
آئی ءَ گوشتگ که بیست ءُ ھشت جون ءِ شپ ءَ بی ایل ایپ ءِ سرمچاراں چیریں ھالانی بنیاد ءَ مشکے ءِ ھند گورکائی ءَ ریاست ءِ جوڑ کرتگیں ٹولی ءِ کارمندانی کاروان ءَ ھواریں چار پرپٹاں چه یک پرپٹے گوں چیر کرتگیں شورھاں نشانگ کرتگ ، ایشی آسر ءَ یک کارمندے جاھی مرتگ ءُ یکے سکا ٹپی بیتگ.
جارکش ءَ گوشتگ که کشگ بیتگیں کارمند ھیر بکش ء اشرپ مھمد ھسنی اِنت ، ٹپی بیتگیں کارمند گل مھمد ء پکیر اھمد اِنت ، ھیر بکش ریاست ءِ جوڑ کرتگیں ٹولی ءِ ٹوھیں کارمندے بیتگ ، آئی ءِ پت اشرپ 2017 ءَ بی ایل ایپ ءِ اسنائپر ٹیم ءَ یک کاروائی یے ءَ نشانگ کرتگ ءُ کشتگ ، اے ٹولی آواران ءِ دمگ ھاس مشکے ءَ راجی جھد ءِ بگیری ، زوربیگواھی ءُ کوشاں تچک ءَ هوار اِنت۔
میجر گھرام بلوچ ءَ درشان ءِ گڈی ءَ چاگے ءُ مشکے ءِ کاروائیانی زمه واری من اتگ ءُ گوشتگ که چه رسانکدر ءِ پارست ءَ بلوچ راج ءَ ھمے دلجمی ءَ دے ایں که درسیں بلوچ دژمنیں ناشرکار ءُ زوراکاں یک په یک ءَ هلاس کن ایں۔
