تربت: نیشنل پارٹی ءِ سروک ءُ بلوچستان پیشگیں مزن وزیر ڈاکٹر مالک بلوچ ءَ سیمسر ءِ بند کنگ ءِ پژدر ءَ گوشتگ که اے سیسمری کار ءُ بار ءِ سر ءَ بندش بلوچستان ءِ مردماں تنگدستی ءِ نیمگ ءِ تیلانک دیگ اِنت.
آئی ءَ گوشتگ که چه سرکار ءِ نا بزانتیں پیسله ءَ نه ایوک ءَ کار ءُ بار ھلاس بیتگ بلکیں دمگ ءِ ته ءَ تنگدستی ، بے کاری ءُ چاگردی ناشرکاری ھم یکشل ءَ گیش بوگ ءَ اِنت ، بلوچستان ءِ گیشتریں ھند ءُ دمگانی کار گوں سیمسر ءَ بندوک اِنت ءُ اے بندش ءِ ھرابیں سان ایوک ءَ کار ءُ روگار ءِ سر ءَ ناں بلکیں چاگردی ءُ سسائی پارست ءَ هم گندگ بنت۔
ڈاکٹر مالک ءَ گوشتگ که جھان ءِ آدگه ھنداں سیمسری کار ءُ بار په مردمانی جاور ءُ روزگار ءَ گھتری ءَ مھکمیں وڑے ءَ کنگ بیتگ بلے اِد ءَ گوں نا بزانتی ءَ بند کنگ بیتگ که اے مردمانی جاورانی گیش ناگیگ کنگ اِنت۔
ڈاکٹر مالک بلوچ ءَ گڈی ءَ سیمسر ءِ کار ءِ پچ کنگ ءِ پله مرزی ءَ گوشتگ که سیمسر ءِ پچ کنگ په بلوچستان ءِ ایمنی ءُ وشھالی ءَ الّمی اِنت دانکه مردمانی کار ءُ روزگار پھازگ به بیت۔
