بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ ماں چاگردی رسانکدر ایکس ءَ زوربیگواھیں مھمد یاکوب ءِ زھگ مبشر ءِ تامربند ءِ سر ءَ نبشتگ کہ مبشر آواران مشکے ءِ جھمنند اِنت آئی پت مھمد یاکوب 5 جولائی 2013 ءَ چہ لسبیلہ وندر ءَ جنین ءُ زھگانی دیم ءَ آزار داتگ ءُ زور بیگواہ کرتگ۔
آئی ءَ گوشتگ کہ مھمد یاکوب ءِ کھول ءِ کِر ءَ آئی زوریں بیگواھی ءِ درسیں منانک ءُ کاگد ھست اَنت، اے ریاست ءِ تہ ءَ چوشیں در ءُ دروازگ نیست کہ آیاں نہ ٹک اِتگ، دہ سال ءِ گوزگ ءَ پد آئی کھول مرچی ھم زھرشانی نندانک ءَ ساڑی اِنت۔
سمی دین ءَ گوشتگ کہ اے دہ سال ءِ تہ ءَ انساپ ءِ کجام لوٹ پیلو کرتگ اَنت مارا بہ گوش اِت۔ اے ھما زمینی راستی اَنت آ چہ سالاں پاکستانیاں بلوچستان ءِ بارو ءَ چیر دیگ بوتگ اَنت۔
