بلوچ نیشنل موومنٹ ( بی این ایم ) ءِ چیردستی ءَ ماں لندن ءَ برتانیا ءِ سروزیر ءِ لوگ ( 10 ڈاؤننگ دمک ) ءِ دیم ءَ زھرشانی بیتگ۔اے زھرشانی گوں آزار آماچیں مردماں ھمدردی درشان ءِ جھانی روچ ءُ بی این ایم ءِ راھشون ڈاکٹر دین مھمد ءِ زور بیگواھی ءِ 16 سال سرجم بیگ ءِ درگت ءَ بیتگ۔
زھرشانی ءَ چہ سرجمیں برتانیا ءَ بی این ایم ءِ کارکن ، دگہ بلوچ ءُ انسانی ھکانی پانکجناں بھر زرتگ۔ بھر زیروکاں جر نبشت ءُ تاکانی پارست ءَ بلوچستان ءَ برجاھیں ریاستی زوراکی ءُ زور بیگواھی ایر جتگ اَنت۔
گْوشتانک دیوکاں گْوشتگ بلوچستان ءَ زور بیگواھی سکا مزنیں مردمی ویلے جوڑ بیتگ ، آ اود ءَ پاکستانی ریاست ءِ ادارھاں سالانی سال اِنت کہ بلوچاں زور بیگواہ ءُ آیانی کھولاں آزار ءِ آماچ کنگ ءَ اَنت۔بلے بلوچ راج پہ وتی سرڈگار ءُ آجوئی ءَ پرجوش ءُ پرتوان اِنت ءُ وتی جھد ءَ برجاہ دار ایت۔
راھشوناں ڈاکٹر دین مھمد بلوچ ءِ زور بیگواھی ءِ بارہ ءَ گْوشتگ آئی ءِ چک سمی دین جھان ءِ دْراج تریں روانک ءَ گون بیتگ ، ھزاراں مات ءُ چک ماں بلوچستان ءَ زھرشانی کنگ ءَ اِنت ، کلانھیں راھشون واحد کمبر ھم آوار جنگ ءَ پد زور بیگواھی ءِ جاور ءَ آزارجاہ ءَ بندیگ اِنت ، ڈاکٹر ماہ رنگ بلوچ ءِ پجیگ ءَ انسانی ھکانی کارکن ، اھوالکار ، سیاسی راھشون ءُ وکیل پاکستانی زنداناں بند اَنت۔
گْوشتانک دیوکاں میان راج ءُ انسانی ھکانی پانکجن کڈن کرتگ کہ آ بلوچستان ءَ برجاھیں زوراکی ءِ سر ءَ بے تواری ءَ بہ آسرین اَنت ءُ پاکستان ءِ ریاستی ناشرکاری ءُ زور بیگواھیانی گر ءُ دار ءَ مادنیں گامگیج بہ زیر اَنت۔
بی این ایم ءِ سروکاں گْوشتگ بلوچ راج ریاستی زوراکی ، زور بیگواھی ءُ کشت ءُ کوش ءَ پد ھم پہ وتی آجوئی ءِ جھد ءُ انسانی ھکانی پھریزگ ءَ میلانک اِنت۔
