بلوچ اسٹوڈنٹس آرگنائزیشن ( بی ایس او ) ءِ سروکاں چہ شال پریس کلب ءَ گلام الی بلوچ ءُ اورنگزیب بلوچ ءِ زوریں بیگواھی ءِ بابت ءَ پریس کانپرنس کرتگ ءُ گوشتگ کہ یکشمبے 22 جون ءَ پاکستانی پوج ءُ چیریں ادارھانی کارمنداں بی ایس او مستونگ ھنکین ءِ بنجاھی کارگشاد گلام الی بلوچ چه شال، جناه ٹاؤن ءَ درکانودی آوار جتگ ءُ بیگواه کرتگ. ھمے وڑ ءَ گوستگیں ماه ءَ بی ایس او مستونگ ھنکین ءِ سنگت اورنگزیب بلوچ ھم چه گس ءَ ریاستی چیریں ادارھانی کارمنداں زوربیگواه کرتگ که انگت ءَ آئی ھچ وڑیں ھال نیست.
بی ایس او ءِ سروکانی گوشگ اِنت که بلوچ ءُ بلوچستان ءِ سر ءَ ریاست ءَ بیمناکیں زوراکی یے بندات کرتگ که ایشی آسر ءَ سدانی کچ ءَ بلوچ نودربر زوربیگواھی ءُ درکانودی کوش ءِ نشانگ کنگ بوگ ءَ اَنت ، ھمے وڑ ءَ سیاسی کارکنانی سر ءَ هم ترندیں زوراکی ءُ بندش برجاه اَنت دانکه آیانی کار اوشت ءِ آماچ به بیت ، چوش که بی وائی سی ءُ آدگه گھگیری کنوکیں کارکن بندیگ جاھاں بند کنگ بیتگ اَنت ، ایشی ءءَ مستریں مول ترس ءُ زوراکی ءِ پارست ءَ بلوچ راج ءِ توار ءِ دارگ اِنت۔
آیاں گوشتگ که ما یک گلے ءِ پارست ءَ توانمنداں تچک ءَ گوشگ لوٹ ایں که بی ایس او ءِ گوستانک چه گوستگیں بازیں دھکاں ریاستی زوراکی ءُ ترس ءِ بگیری ءَ گوں ایمنیں جھد ءُ دیمونیاں ھوار اِنت، گوں زوراکی ءَ بلوچ ورناھانی سیاسی لیکھ ءِ تباه کنگ ءِ جھد چو پیسری وڑ ءَ پروش ءِ آماچ بیت۔
بی یس او ءِ سروکاں گوشتگ که ما پریس کانپرنس ءِ پارست ءَ ریاست ءَ تچک ءَ ھمے کلوه ءَ دے ایں گلام الی بلوچ ءُ اورنگزیب بلوچ زمه وار ءُ ایمنیں سیاسی کارکن اَنت ، ما آیانی زوربیگواھی ءَ ڈیموکرسی ءُ کانودی جھد ءِ سر ءَ اُرش سرپد به ایں. گلام الی ءُ اورنگزیب ءَ اگاں میارے ھست گوں شان ءُ شرپ ءَ ریاستی آمیدگس ءَ پیش کنگ به بنت ، اگاں ناں گل بے میاریں ورناھانی درکانودی بندیگی ءَ ھچ وڑ ءَ نه من ایت ، اگاں گلام الی ءُ اونگرزیب ءِ آجو کنگ ءِ بابت ءَ دلجمی دیگ نه بیت گل په سنگتانی یل کنگ ءَ سیاسی زرمبشتے برجاه دار ایت ، ما گوں درسیں سرپدیں مردم ، سیاسی کارکن ، وکیل ، سیاسی گل ، سنگت ءُ نودربراں لوٹ کن ایں که آ مئے سنگتانی یل کنگ ءَ مئے گون ءَ هوار به بنت۔
