کیچ: بی ایس او ءِ سرکماش بالاچ کادر گل ءِ نیمگ ءَ ترّ ءُ گردے ءَ تمپ ءَ شتگ۔ گوں آئی بنجاھی پتر ءِ باسک کرم ھان، تربت ھنکین ءِ کارگشاد شے پراز، سھراب ھالک، اویس ءُ گل ءِ آدگہ زمہ وار ھمراہ بوتگ اَنت۔
بی ایس او ءِ سرکماش تمپ ءَ سربوتگ شھید بانک کریمہ ءِ گڈی وابجاہ ءَ شتگ ءُ دوا لوٹ اِتگ۔ آ تمپ ءِ وانشجاہ ءَ شتگ ءُ گوں استادان ءُ تمپ ءَ بی ایس او ءِ پیشیگیں سرکماش نسیر گچکی ءِ گون ءَ گند ءُ نند کرتگ۔
بی ایس او ءِ سرکماش بالاچ کادر ءَ تمپ ھنکین ءِ دیوان کرتگ ءُ دیوان ءَ تران کنان ءَ گوشتگ کہ راجدوستی ءِ سیاست ءَ تمپ ءِ گوستانک شموشگ نہ بیت۔ چہ ماس پارٹیانی سیاست ءَ بگر نودربر سیاست ءِ جھد ءَ تمپ ءَ جوانیں کردے پیلو کرتگ۔ تمپ شھید بانک کریمہ ءَ ھوار ھما لیکھی مردمانی جاہ اِنت کہ آیاں چہ وتی سیاسی زانوگری ءَ بلوچ ءِ راجدوستیں سیاست مھکم کرتگ۔
آئی گوشتگ کہ وھد ءِ لوٹ ھمیش اِنت بلوچ نودربرانی سیاست بلوچ سرڈگار ءِ کنڈ کنڈ ءَ سر کنگ بہ بیت۔ نودربرانی سیاست ءَ دھر ءِ نوکیں لوٹانی گون ءَ ھمگرنچ کنگ ھژدری اِنت۔
بالاچ کادر ءَ گوشتگ کہ اسلام آباد ءَ برجاھیں زھرشانی نندانک ءَ ھمے پدر کرتگ کہ بلوچ راج نوں گیشتر زوراکی اوپار کرت نہ کنت۔ پہ پرایمنیں زرمبشت ءِ دارگ ءُ مدام بلوچانی چہ مردمی ھکانی زبھر کنگ ءَ جتائیں پندل چکاسگ بوگ ءَ اِنت۔ کشندہ ٹولی ءِ پارست ءَ اسلام آباد نندانک ءِ بگیری ءَ پندل ساچگ بوگ ءَ اِنت۔
آئی ءَ گوشتگ کہ اسلام آباد ءَ برجاھیں زھرشانی زرمبشت ءَ بلوچ ءَ ھوار پاکستان ءِ درسیں نزوریں راجانی پلہ مرزی گون اِنت۔ اے زرمبشت بلوچستان ءَ چکچینی ءِ بگیری ءَ یک جنزے۔ بلوچ نودربراں انوگیں وھد ءِ لوٹ زانگ ءُ پہ مردمانی یکجاہ کنگ ءَ بھر زورگی اِنت۔
