مستونگ: زور بیگواھیں آبدھسین ءُ گلام الی ءِ کھول ءَ پہ وتی آزیزانی آجوئی ءَ لوٹ کرتگ ءُ گوشتگ کہ 24 مئی 2025 ءَ شپ ءِ سے ءَ کلی دتو ءَ ایپ سی ءُ سی ٹی ڈی ءَ مئے گس ءَ بیڑ برتگ ءُ چادر ءُ چار دیوالی لگتمال کرتگ اَنت ءُ آبدھسین ء مھمد زمان گوں برات ءَ آوار جتگ ءُ برتگ۔ راہ ءَ برات یل کنگ بوتگ بلے آبد ھسین انگت بیگواہ اِنت۔
آئی ءَ گوشتگ کہ ما شال کراچی شھدگ ءَ شھید گلام الی چاراہ ءَ داں دہ ادار ءَ زھرشانی ءَ نشتگ ایں۔ اے ڈی دی مھمد اپزل سرپرہ ءَ نبشتھی کول کرتگ کہ آبدھسین داں چار روچ ءَ یل کنگ بیت ءُ چہ گس ءَ چار موبائل ءُ آدگہ برتگیں درسیں سامان پد ءَ دیگ بنت۔ بلے آئی کول دروگ بوتگ۔
آئی ءَ گوشتگ کہ ھمے زوراکی انگت ءَ ھلاس نہ بوتگ 22 جون 2025 ءَ مئے دگہ سْیادے گلام الی ء ابدالکریم بلوچ کلی دتو ءِ جاہ منند اِنت، آ چہ شال جناہ ٹاون ءَ آوار جنگ بیتگ۔
آئی ءَ گوشتگ کہ ما پہ یکیں کھول ءِ دو ورنا ءَ پریات کنگ ءَ ایں، آیانی سر ءَ چونیں بھتامے ھست گڑا آمیدگس ءَ پیش کنگ به بنت، اگاں بے میار اَنت گڑا زوت یل کنگ بہ بنت۔
آئی ءَ گوشتگ کہ اگاں مئے آزیز یل کنگ نہ بوت اَنت ما پد ءَ زھرشانی ءَ شال کراچی شھدگ ءَ بند کن ایں۔
