تمپ: زورگریں پاکستانی لشکر ءِ دست ءَ زور بیگواہ کنگ بوتگیں گپار ء سادِک، چاکر ء اکتَر ءُ اوزیر ء مھردل ءِ کھول ءَ آیانی آجوئی ءِ لوٹ کرتگ۔
کھولانی گوشگ اِنت کہ اے ورنا جتا جتائیں وھداں پاکستانی لشکر ءَ آوار جتگ ءُ بیگواہ کرتگ اَنت۔ گپار ءُ چاکر ءَ چار ماِہ اِنت ءُ اوزیر ءَ ماھے بیت کہ زور بیگواہ کنگ بوتگ۔
آیانی گوشگ اِنت کہ مئے آزیزانی بیگواھی ءَ کھول ءِ درسیں مردم رنجانی دیمپان اَنت۔ انچو وھد ءِ گوزگ ءَ پد مارا وتی بیگواھیں مردمانی بارو ءَ ھچ وڑیں سرپدی دیگ نہ بوتگ۔
کھولاں گوں مردمی ھکانی ادارھاں ھوار بلوچ یکجھتی کمیٹی ءِ برجاھیں زھرشانی نندانک ءَ نشتگیں ڈاکٹر ماہ رنگ ءُ آدگہ زور بیگواھیں مردمانی کھولانی گون ءَ دزبند کرتگ کہ پہ مئے زور بیگواھیں آزیزاں توار چست بہ کن اَنت۔
زور بیگواھیں درسیں ورنا تمپ ءِ میتگ گومازی ءِ جھمنند اَنت۔ گپار ء سادِک ءُ چاکر ء اکتر پاری اکتوبر ءَ چہ جند ءِ گساں آوار جنگ بوتگ اَنت ءُ اوزیر دسمبر ءَ بیگواہ کنگ بوتگ۔
