مستونگ: گوستگیں ماه ءَ پاکستانی پوج ءِ تیرگواری ءَ کشگ بیتگیں ورنا سید اھسان شاه ءِ مات ءَ مستونگ پریس کلب ءَ پریس کانپرنس کرتگ ءُ گوشتگ که من ءَ چه ریاست ءَ ھچ وڑیں اُمیت نیست ، بلوچ سیاسی اداره منی توار به بنت ءُ من ءَ انساپ به دے اَنت.
آئی ءَ گوشتگ که 3 جون ءَ شال ءِ ھند گنجه ڈوری ءَ پاکستانی پوج ءِ کارمنداں منی زھگ داشتگ ءُ آئی ءِ سر ءَ تیرگواری کرتگ ، دو تیر منی زھگ ءِ گردن ءَ لگ اِتگ ءُ یک تیرے آئی ءِ سنگت شئیب ءِ چم ءَ لگ اِتگ ، چه ایشی ءَ پد ایپ سی ءِ کارمنداں ٹپی بیتگیں شئیب په الاج ءَ نادراھجاه ءَ دیم داتگ ءُ آئی ءَ را ھمے بیھار داتگ که اگاں اے ویل ءِ بابت ءَ گپ به کن ئے تئی الاج کنگ نه بیت۔
اھسان شاه ءِ مات ءَ گوشتگ که ساری ءَ مارا ھمے گوشتگ اِش که تئی زھگ پجار نہ بیتگیں مردماں کشتگ ، وھدے که منی لوگواجہ په ایپ آئی آر کنگ ءَ مستونگ تھانه ءَ شتگ آئی ءَ را بیھار داتگ اِش که اگاں کیس ءَ ایپ آئی آر به کن ئے ترا جانی تاوان دیگ بیت ءُ تئی نوکری ھم چه ترا پلگ بیت۔
آئی ءَ گوشتگ که منی زھگ ءِ اُمر شانزده سال بیتگ ءُ نُھمی کلاس ءِ نودربرے بیتگ ، آئی ءِ میار چے بیتگ که کشگ بیتگ ، آئی ءِ میار بس ھمے بیتگ که آ بلوچ نودربرے بیتگ.
اھسان شاه ءِ مات ءَ گڈی ءَ گوشتگ که من ءَ چه ریاست ءَ ھچ وڑیں امیت نیست که من ءَ انساپ به دنت ، من گوں درسیں بلوچ سیاسی ادارھاں لوٹ کناں که منی توار جوڑ به بنت ءُ من ءَ انساپ به دے اَنت.
