بلوچ نیشنل موومنٹ ( بی این ایم ) ءِ مردمی ھکانی ادارہ پانک ءَ وتی درشان ءَ بلوچستان ءَ زوریں بیگواھی ءِ ویلانی سر ءَ بژن درشان کرتگ ءُ گوں ترندیں دانکاں ایر جتگ ءُ گوشتگ کہ پاکستانی پوج بے میاریں شھری کہ آیانی تہ ءَ کم امریں زھگ ءُ پر ایمنیں مردم ھوار اَنت تچک ءَ زوراکیانی نشانگ کنگ ءَ اِنت۔
آئی ءَ گوشتگ کہ 15جون 2025 ءَ شال ءَ مھمد ندیم ء مھمد رھیم کلات ءِ ھند منگوچر، جوھان ءِ جاہ منند چہ سلیم کلپلیکس ءَ آوار جتگ ءُ بیگواہ کرتگ۔ 19 جون 2025 ءَ چہ پسنی شادی کور ءِ چوکی ءَ پاکستانی پوج ءَ سے مردم آوار جتگ کہ آیانی نام تارک ءِ کھدہ پولات، پیر داد ء پیری ءُ ھمل اِنت۔
آئی ءَ گوشتگ کہ 19 جون 2025 ءَ چہ ھب چوکی ءَ چاردہ سالی ئیں نودربر مھمد امران ء الی اھمد بلوچ ءَ ایپ سی ءُ سی ٹی ڈی ءَ آوار جتگ ءُ بیگواہ کرتگ۔
آئی ءَ گوشتگ کہ اے آوار جنی سرکار ءِ دیرییگیں پالیسی ءَ پیش دار اَنت کہ آ بے میاریں شھریاں نشانگ کنگ ءُ بگیریانی دارگ برجاہ داشتگ۔ پانک درسیں بیگواھیں مردمانی زوتیں آجوئی ءِ لوٹ ءَ کنت ءُ گون میان استمانی انسانی ھکانی ادارھاں لوٹ کنت کہ آ اے زوراکیانی سر ءَ پاکستان ءَ جست بہ کن اَنت۔
