بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں 22 جون ءَ یک شمبے ءِ شپ ءِ ادار ھپت ءَ شال ءِ ھند دشت ءَ سپیزنڈ لیویز تانہ دستیگ کرتگ ءُ اود ءَ ساڑی ئیں کارمند دزگیر کرتگ اَنت ءُ آیانی درسیں سرکاری سلاہ ءُ سامان برتگ اَنت۔
آئی گوشتگ کہ سرمچارانی یک دگہ ٹولی یے ءَ سبی شھدگ سپیزنڈ تانہ ءِ دیم ءَ بستگ ءُ گاڑی پٹ ءُ پول کرتگ اَنت۔ ھمے میان ءَ دشت ءُ مستونگ ءَ روکیں شھدگ ھم بند کرتگ ءُ اُمر ڈور ءِ ھند ءَ ھوار درسیں ھنداں داں شپ ءِ ادار یازدہ ءَ تر ءُ گرد کرتگ۔
آئی گوشتگ کہ شال، مستونگ ءُ نوشکے ءِ وڑیں یک ھاس ءُ مزنیں شھدگانی بند کنگ، لیویز تانھانی گِرگ ءُ اود ءَ ایریں سلاھانی دستیگ کنگ بی ایل ایپ ءِ سرمچارانی سوبمندیں آپریشنل شوربندی ءُ توان ءَ پدّر کنت۔
میجر گھرام بلوچ ءَ دشت ءَ لیویز تانہ ءَ سرکاری سلاھانی دستیگ کنگ ءِ زمہ واری ءَ من اتگ ءُ گوشتگ کہ داں بلوچستان ءِ آجوئی ءَ زورگریں پوج ءُ آئی شوربندیاں نشانگ کنگ ءِ کول ءَ کن ایں۔
