بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل ایپ ءِ سرمچاراں 21 جون ءَ مستونگ ءِ ھند کردگاپ ءِ شھر ءَ لیویز تانه ، نادرا آپس ءُ اسسٹنٹ کمشنر ءِ کارگس ءِ سر ءَ اُرش کرتگ ءُ دستیگ کرتگ اَنت ، کاروائی ءِ وھد ءَ سرمچاراں لیویز تانه ءِ درسیں سلاه ءُ سامان زرتگ اَنت که اِیشانی ته ءَ چار سی تیری ، یک جی تھری یے ، شانزده رائپل ءُ یک پرپٹے ھوار اَنت ، سرمچاراں تانه ءِ درسیں گاڑی ءُ سامان مانداشتگ اَنت ، کاروائی ءِ سرجم کنگ ءَ پد سرمچاراں سرجمیں دمگ ءِ ته ءَ تر ءُ گرد کرتگ۔
آئی ءَ گوشتگ که ھمے وڑ ءَ سرمچاراں کردگاپ داں منگچر دگ بند کرتگ ، کردگاپ ھوٹل ءُ پٹرول پمپ ءَ دگ بندی ءِ میان ءَ سرمچاراں سے دری مردم دزگیر کرتگ ءُ گیس بروکیں ھپت بوزر گاڑی نشانگ کرتگ ءُ تاوان داتگ اَنت۔
جارکش ءَ گوشتگ که دومی دگ بندی کردگاپ دوراھی ءَ بیتگ که گیس بروکیں پنچ بوزر گاڑیانی ٹائر جتگ اَنت ءُ پٹ ءُ پول ءِ میان ءَ سے دری مردم دزگیر کرتگ۔
آئی ءَ گوشتگ که بی ایل ایپ ءِ سرمچاراں دوشی شپ ءِ ھپت ءَ شال ، نوشکے ، تپتان ءِ مزنیں شھدگ بند کرتگ ءُ داں شپ ءِ 12 ءَ برجاه داشتگ ءُ گاڑی پٹ ءُ پول کرتگ اَنت ، داں پنچ اَدار ءَ دگ بندی ءَ دژمنیں پوج ءَ ھچ وڑیں تر ءُ گرد نه کرتگ۔
جارکش ءَ گوشتگ که مرچی سھب ءِ یازده ءَ بی ایل ایپ ءِ سرمچاراں ھزدار ءِ ھند وڈ ڈھکلو ءَ گرانھادیں سنگ ءُ مادن بروکیں دو گاڑیانی سر ءَ اُرش کرتگ اُرش ءِ آسر ءَ گاڑی ءُ لڈ اِتگیں بار ءَ تاوان بیتگ بلے ڈرائیور ءَ ھچ وڑیں تاوان نه بیتگ۔
میجر گھرام بلوچ ءَ اے کاروائیانی زمه واری من اتگ ءُ گوشتگ که داں بلوچستان ءِ آجوئی ءَ وتی کاروائیانی برجاه دارگ ءِ کول ءَ کن ایں۔
