تربت پریس کلب ءِ دیم ءَ بی وائی سی کیچ ءِ نیمگ ءَ برجاھیں سے روچی زھرشانی گدان ءَ بی وائی سی کیچ ء سروکاں پریس کانپریس کرتگ ءُ گوشتگ کہ بی وائی سی کیچ بنجاھی جار ءِ رد ءَ داں سے روچ ءَ شدکشیں زھرشانی گدان ءَ نشتگ، آئی مول بی وائی سی ءِ بنجاھی سروک ڈاکٹر ماہ رنگ بلوچ، بیبو بلوچ، سبگت اللہ شاہ جی بلوچ، بیبرگ بلوچ ءُ گلزادی بلوچ ءَ ھوار آدگہ سروکانی پہ نیمون دزگیری ءُ یل نہ کنگ ءِ بگیری ءَ زھرشانی کنگ بیتگ۔ بلوچستان ءَ بلوچ چکچینی ءُ ھمک روچ آوار جنی، دروگیں میڑاں دزگیر بیتگیں مردمانی کوش، لاشانی کمشرپی، انسانی ھکانی لگتمالیانی بگیری ءَ زھرشانی کنگ کرتگ۔
آئی ءَ گوں اھوالکاراں دلگوش گور کرتگ ءُ گوشتگ کہ ما چہ شمئے رد ءَ ھما درسیں مردمانی منت ءَ گریں کہ آ اے روچاں مئے گوں ءَ اوشتاتگ اَنت ءُ مئے گدان ءَ آتکگ اَنت۔ کیچ بار ایسوسی ایشن، سول سوسائٹی ءِ سروک ءُ باسک ، بی این پی ءِ دمگی سروک ءُ آدگہ بھرگاں سیادی داروکیں مردم ھوار اَنت کہ آیاں مئے گون ءَ ھمراھداری کرتگ۔ آیانی تہ ءَ اھوالکار ھم گون بیتگ اَنت۔
آئی ءِ گوشگ اِنت کہ بنجاھی جار ءِ پد ءَ مئے زھرشانی سے روچی زھرشانی گدان بیتگ ءُ مئے زھرشانی گدان ءِ سیمی روچ مرچی سرجم بیتگ ، ما مرچی وتی زھرشانی ءِ ھلاس کنگ ءِ جار ءَ جن ایں۔ دیمءَ چونیں زھرشانی یے کنگی بوت شمارا سرپد کن ایں۔
