شال: چہ پاکستانی پوج ءِ چیریں آزارا جاھاں آجو بوتگیں ورنایے ءَ ٹپانی درد نہ سگ اتگ ءُ بیران بوتگ۔
بیران بوتگیں ورناءِ نام شاہ زیب ء شریپ اھمد اِنت ءُ شال ءِ ھند کلی کمبرانی ءِ جھمنند اِنت ءُ پاکستانی پوج ءَ مزنیں ائید ءِ چارمی روچ ءَ ھما وھد ءَ آوار جتگ کہ آ وتی سنگتانی ھواری ءَ منگچر ڈیم ءَ پکنک ءَ شتگ ءُ واتر گس ءَ روگ ءَ بوتگ کہ شپ ءَ آیانی پرپٹ ھراب بوتگ، پاکستانی پوج ءَ سے ئیں ورنا آوار جتگ اَنت۔
شاہ زیب ءِ کھول ءِ گوشگ اِنت کہ پاکستانی پوج ءَ شاہ زیب سک باز آزار داتگ کہ آ آجوئی ءَ پد لھتیں ادارانی میان ءَ بیران بیتگ۔
کھول ءِ گوشگ اِنت کہ بندیگی ءِ جاہ ءَ ورنا در انسانی آزارانی دیمپان کنگ بیتگ۔ شاہ زیب ءِ جان ءَ داگ ءِ نشان بوتگ ءُ آئی دست پرشتگ، ھور کشگ بوتگ اَنت ءُ دیم ءِ ٹپ وت آئی آزارانی گواھی ءَ دے اَنت۔
آیاں گوشتگ کہ آئی جان ءَ پلاسٹک آپ کرتگ ءُ داتگ، گرم کرتگیں آپ دپ پہ زور وارینگ بیتگ۔ شاہ زیب آجوئی پد زوت سنگتے ءِ ھواری ءَ نادراھجاہ ءَ برتگ بلے آئی ٹپانی درد نہ سگ اتگ اَنت ءُ بیران بوتگ۔
کھول ءِ گوشگ اِنت کہ شاہ زیب بیرانی ءِ وھد ءَ گوشتگ کہ کاپر ھم جنگ ءِ وھد ءَ گوں انساناں اے وڑ نہ کن اَنت کہ آیاں کرتگ۔
چہ بیگواھیں مردماں یکے انگت بیگواہ اِنت کہ آئی بابت ءَ ھچ وڑیں ھال نیست۔
