ایران ءَ مرچی سھب ءَ اسرائیل ءِ سھیونی پوج ءِ کمانڈ ءُ انٹلی جنس ءِ ھیڈ کوارٹر ءُ انٹلی جنس ءِ بنجل گوں میزائلاں نشانگ کرتگ اَنت۔ اسرائیل ءَ نوکیں ارشانی آسر ءَ 126 مردمانی ٹپی بوگ ءِ گپ من اِتگ ءُ گوشتگ کہ ایران ءَ سورو ءِ نادراھجاہ نشانگ کرتگ۔
پنچ شمبے ءِ سھب ءَ اسرائیل ءِ سر ءَ ایران ءِ نیمگ ءَ بیتگیں ارشانی بابت ءَ روسی رسانکدری ادارہ آر ٹی ءَ ایکس ءَ جتائیں پوسٹانی تہ ءَ سورو نادراھجاہ، تل ابیب اسٹاک ایکسچینج ءُ آدگہ جاھانی ماڑیانی تاوان پیش داشتگ اَنت۔
چہ ایرانی ارش ءَ پد تل ابیب اسٹاک ایکسچینج ءَ ھوار آدگہ ماڑی ھالی کنگ بیتگ اَنت۔
تھران ٹائمز ءِ رد ءَ ایرانی سرکار ءِ گوشگ اِنت کہ اسرائیلی پوج ءِ کمانڈ ءُ انٹلی جنس ءِ ھیڈ کوارٹر ءَ ابید بیر شیبا ءَ گیویام ٹیکنالوجی پارک ءَ یک پوجی انٹلی جنس جاھے گوں میزائلاں نشانگ کرتگ۔
