ایرانءُ اسرائیل ءِ جنگ گوں ترندی ءَ برجاہ اَنت۔ دوشی ھم ایرانءَ اسرائیل ءِسر ءَ میزائل آس داتگ ءُ اسرائیل ءَ دوشی ایرانءِ بنجاھی شھر تھرانءِ سر ءَارش کرتگ۔
جھانی رسانکدر ءِ ردءَ ایرانءَ ” آپریشن وعدہ صادق سوم ” ءِ دھمی بھر بندات کرتگ ءُ اسرائیل ءِ سر ءَ دگہ باز میزائل اس داتگ۔
اسرائیل ءِ رسانکدر ءَ ارشانی گپ راست کرتگ ءُ گوشتگ کہ بیست میزائل ارش کنگ بیتگ کہ تل ابیب، ایروشلم ءُ شیرون ءَ کپتگ اَنت۔
ایرانی پاسداران انکلاب ءِ جارکش ءَ گوشتگ کہ اسرائیل ءِ سر ءَ ھاپر سونک پتے ون میزائل ارش کرتگ۔ ایران ءِ نیمگءَ اسرائیلی سرکار ءِ ھما پزائی اڈہ نشانگ کنگ بیتگ اَنت کہ ایران ءِ سر ءَ پہ ناشرکاری ءَ کارمرز بنت۔
اسرائیل ءَ ایران ءِ بنجاھی شھر تھران ءَ پد ماں پد ءَ ارش کرتگ چہ ایشی ءَ یک ماڑی یےءَ بن کرتگ۔
اسرائیلی رسانکدر ءِ رد ءَ تھران ءُ کرج شھر ءَ تراکانی توار اش کنگ بیتگ اَنت۔ اسرائیلی سرکار ءَ تھران ءِ دمگ ھژدہ ءِ جاہ منند کڈن کرتگ اَنت کہ آ دمگ ءَ ھالی بہ کن اَنت۔
دومی نیمگ ءَ ایرانی رسانکدر ءِ گوشگ اِنت کہ اسرائیل ءَ تھران ءِ نزیک ءَ میزائل جوڑ کنوکیں شرکت نشانگ کرتگ۔ اکتوبر ءَ ھم اسرائیل ءَ ھمے جاہ نشانگ کرتگ۔
واشنگٹن ڈی سی ءِ برجاھیں انسانی ھکانی گل ہیومن رائٹس ایکٹیوسٹس ءِ گوشگ اِنت کہ چہ انوگیں اسرائیل ءِ ایران ءِ سر ءَ ارشاں کم چہ کم 585 مردم مرتگ ءُ 1326 مردم ٹپی بیتگ اَنت۔
گل ءِ گوشگ اِنت کہ مرتگیں مردمانی تہ ءَ 239 لس شھری اَنت ءُ آیانی تہ ءَ 126 لشکری کارمند ھوار اَنت۔
چہ ایران سرکار ءِ نیمگ ءَ داں انوں ارشاں مرتگیں مردمانی لڑ نوک کنگ نہ بیتگ۔ گڈی بر ءَ دوشمبے ءِ روچ ءَ شنگ بیتگیں لڑ ءِ ھساب ءَ 224 مردم مرتگ ءُ 1277 مردم ٹپی بیتگ۔
