مرچی سھب ءَ مھلہ ایران ءَ اسرائیل ءِ سر ءَ ارش کرتگ ءُ درزنانی کچ ءَ بیلیسٹک میزائل آس داتگ ایشی آسر ءَ اسرائیل ءِ باز ماڑی لمب اتگ 8 اسرائیلی مرتگ ءُ 300 ٹپی بیتگ۔ اے ارشاں ھیپہ پاور پلانٹ نشانگ کنگ بیتگ۔
یک شمبے ءِ روچ ءَ ایران ءُ اسرائیلءِ میان ءَ نوکیں میڑاں دوئیں ڈیھانی نیمگ ءَ راکٹ آس دیگ بیتگ۔ تھران ءَ بیتگیں بمب تراک ءَ دگہ پنچ ایٹمی سائنسدان مرتگ ۔ اسرائیل ءِ گوشگ اِنت کہ پاسدار انکلاب ءِ انٹیلی جنس ءِ چیپ ءُ ڈپٹی نشانگ کنگ بیتگ اَنت۔
ایرانی رسانکدر ءِ رد ءَ اسرائیل ءِ ارش ءَ پاسداران انکلاب ءِ انٹیلی جنس ءِ چیپ جنرل مھمد کازمی ءُ نائب ھسن مھکک ءِ مرگ ءِ گپ راست کرتگ۔
ایرانی جاندراھی تک ءِ وزیر ءِ گوشگ اِنت کہ چہ اسرائیل ءِ نیمگ ءَ بیتگیں ارشاں داں انوں 224 مردم مرتگ کہ آیانی تہ ءَ نود درسد لس مردم اَنت۔
امریکی جھگیر مائیک ھکبی ءِ گوشگ اِنت کہ تل ابیب ءَ امریکی سپارتجاہ ءِ نزیک ءَ یک پھناتے ءَ چہ ایرانی میزائلانی ترکگ ءَ کمیں تاوان بیتگ۔ میزائل تچک ءَ ماڑی ءَ نہ لگ اتگ اَنت بلے چہ تراکاں چست بیتگیں ٹکراں ماڑی ءِ لھتیں بھر سانمند بیتگ۔
آئی ءِ گوشگ اِنت کہ اے ارشاں انگت ءَ امریکی کارمند ٹپی نہ بیتگ اَنت ءُ اے وھد ءَ یروشلم ءُ تل ابیب ءِ امریکی سپارتجاہ بند کنگ بیتگ اَنت۔
