بلوچ یکجھتی کمیٹی ءِ سروک سمی دین بلوچ ءَ گوشتگ کہ پہ من ءُ پہ منی وڑیں چنچو جنکاں پتانی روچ یک انچیں روچے کہ وسواس، رنج ءُ گوں انچیں جستاں بندوک اِنت کہ آئی پسو ءَ کس دات نہ کنت۔ منی پت ڈاکٹر دین مھمد زور بیگواہ کنگ بوتگ، ھمے 28 جون ءَ آئی شانزہ سال سرجم بیت۔
آئی ءَ گوشتگ کہ شانزدہ سال آئی توار ءَ ابید، آئی پھازداری ءُ ساڑی بوگ ءَ ابید، آئی مھر ءَ ابید، پہ جھان ءَ بلکیں آ یک پائلے ءَ بندیں نامے بہ بیت، بلے پمن آ منی بابا اِنت، منی سارتیں ساھگ اِنت۔
سمی دین ءَ گوشتگ کہ زندگی ءِ ھمک وشی ءُ سوبمندی، ھمک دمان کہ گوں آئی گوازینگی اَت، آئی ساڑی نہ بوگ تھنا یک مردمے ءِ کمی نہ اِنت، بلکیں گسے ءِ تباھی اِنت۔
آئی ءَ گوشتگ کہ ما جنک مزن بہ ایں، بلے پت ءِ ساڑی نہ بوگ یک انچیں ٹپے پر کنت کہ آئی ءَ وھد درمان نہ کنت، آ ٹپ ھمک چیز ءِ پشت ءَ گوں بے تواری ءَ بے چاڑ کنت۔
سمی دین ءَ گوشتگ کہ بابا دین جان تو کجام تھاریں کوٹی ءَ بندیگے من تئی توان ءَ مارگ ءَ آں، آیاں تئی بے توار کنگ ءِ جھد کرتگ، بلے آیاں تئی پگر داشت نہ کرتگ۔ تئی پگر تئی جنک ءُ تئی راج ءَ زندگ داشتگ۔
آئی ءَ گڈی ءَ گوشتگ کہ من تئی پولگ ءَ برجاہ داراں ءُ پسو لوٹ آں۔ من مڑاں ءُ دانکہ ترا واتر کاراں۔
