تربت؛ 26 مئی ءَ پاکستانی پوج ءِ دست ءَ بیگواہ کنگ بوتگیں گلام جان ءِ کھول ءِ نیمگ ءَ زھرشانی نندانک گوستگیں پنچ روچ اِنت کہ اومری کھن ءَ سی پیک دگ ءَ برجاہ اِنت۔
زرمبش جھگیر ءِ رد ءَ اے وھد ءَ بازیں کچے ءَ مردم زھرشانی ءَ نشتگ اَنت کہ آیانی تہ ءَ جنین ءُ کسانیں زھگ ھم ھوار اَنت، بلے چہ وتگڑیں سرکار ءِ نیمگ ءَ پہ آیانی لوٹانی منگ ءَ دلجمیں گامگیج زورگ نہ بیتگ۔
زور بیگواھیں گلام جان ءِ کھول ءِ گوشگ اِنت مئے لوٹ بس ھمیش اِنت اگاں گلام جان ءِ سر ءَ چونیں بھتامے ھست آمیدگس ءَ پیش کنگ بہ بیت بے میار اِنت گڑا زوت یل کنگ بہ بیت، دانکہ مئے زھگ آجو نہ بوتگ ما وتی زھرشانی ءَ برجاہ دار ایں۔
چوش کہ چہ ایشی ءَ پیش ھم زور بیگواھیں مردمانی کھول پہ وتی آزیزانی آجوئی ءَ بلوچستان ءِ جتائیں شھدگانی سر ءَ داں ھپتگ ءُ باز روچاں زھرشانی ءَ نشتگ اَنت بلے چہ انتزامیہ ءِ نیمگ ءَ دروگیں دلبڈی دیگ ءُ پاد کنگ بوتگ اَنت۔
