بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ ماہ جبین یک جنکے کہ 29 مئیءَ پاکستانی پوجءَ آوارجتگ۔ بس لھتیں روچ ءَ پیش 24 مئی ءَ آئی برات یونس بلوچ ھمے پوج ءَ بیگواہ کرتگ۔ اے جتائیں ویلے نہ اِنت بلوچانی بگیری ءَ زوریں بیگواھی ءُ ریاستی ناشرکاریءِ یک مھکمیں تکشامے ءِ بھر اِنت۔
آئی ءَ گوشتگ کہ چہ آیانی زوریں بیگواھی ءَ پد کھول ءُ سرجمیں راج یکشل ءَ زھرشانی کنگ ءَ اِنت ءُ آئی زوتیں آجوئی ءِ لوٹ ءَ کنگ ءَ اَنت۔ بلے چہ نزورینانی توار ءِ گوشداگ ءَ ابید پاکستان ریاست وتی زوراکی تیز کرتگ اَنت۔
ڈاکٹر نسیم بلوچ ءَ گوشتگ کہ بلوچستان ءَ زوریں بیگواھی، آزاردھی ءُ بندیگیں مردمانی کوش سلاھے جوڑ بیتگ۔
آئی ءَ گوشتگ کہ داں کدی زھگ آوار جنگ بنت، دگہ چنچو کھول آزار اوپار بہ کنت گڑا جھان اے زوراکی ءِ سر ءَ دلگوش دنت۔
