بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که زورگریں پاکستانی پوج ءُ چیریں ادارھانی وتگڑیں مزن وزیر سرپراز بگٹی ءِ سروکی ءَ سلاه بندیں ٹولی ( بگٹی امن پورس ) ءِ کارمندانی یک مزنیں لشکرے ءَ 6 جون ءَ بارکان ءِ کوھی دمگ ، کوه جاندر رکنی ءَ به ایل ایپ ءِ گشتی ٹولی ءِ یک اوتاگے ءِ سر ءَ سھب ءِ اَدار هپت ءَ اُرش کرتگ ، سرمچاراں زوت گوں گھگیری کارشونی ءَ کساس داں سے اَدار ءَ یک دراجکشیں میڑے ءَ دژمن دیم داشتگ ءُ سرمچارانی انگر کنگ ءِ جھد بے سوب کرتگ ءُ در کپگ ءَ سوبین بیتگ اَنت. ھمے وڑ ءَ اے میڑ ءَ کشنده ٹولی ءِ دو کارمند مرتگ اَنت۔
آئی ءَ گوشتگ که بلے جنگ اِد ءَ آسر نه بیتگ بلکیں دژمن ءَ سرمچارانی رندگیری کرتگ ءُ درکپگ ءِ راه بستگ اَنت ، چه جنگجاه ءَ لھتیں کیلومٹر ھما دیم ءَ دژمنیں پوج ءِ نوک سر بیتگیں کمکی ٹولی گوں سرمچاراں دچار کپتگ اَنت که ایشی ءِ آسر ءَ سرمچارانی ءُ دژمن ءِ میان ءَ یک سکیں ترندیں میڑے بندات بیت که اے میڑ داں ھپت اَدار ءَ برجاه بیتگ ، اے دراجکشیں میڑ ءَ بی ایل ایپ ءِ چار سرمچار شھید ءُ راجدپتر ءِ دلبند ءَ نمیران بیتگ اَنت ، ھمے وڑ ءَ زورگریں پاکستانی پوج ءِ دو کارمند مرتگ ءُ باز کارمند ٹپی بیتگ۔
جارکش ءَ گوشتگ که رکنی ءِ کوه جاندر ءَ گوں پوج ءَ شھید بیتگیں میڑ ءَ یک سرمچارے رسان کادر پنام ءِ ریھان ء کادربکش ڈنسر لباچ ، آواران ءِ جاہ منند اِنت. شھید رسان کادر بلوچ اپریل 2023 ءَ بی ایل ایپ ءَ هوار بیتگ ، آئی ءَ بندات ءَ گل ءِ شھری نیٹ ورک ءَ انٹیلیجنس ونگ ءَ زمه واری دیگ بیتگ ، آ یک سوھو ءُ وانندگے سرمچارے اَت ، آئی ءَ شھری نیٹ ورک ءَ وتی زمه واری جوانیں وڑے ءَ سرجم کرتگ اَنت ، وھدے که آ چه دژمن ءِ نیمگ ءَ پجارگ بیتگ 2025 ءِ پروری ءَ گل ءَ بارکان ءِ سنگراں دیم داتگ ، آئی ءَ کمیں وھد ءَ جنگی کار ، چیرجنگی رپک ءُ مھکمی ، یک شریں وڑے ءَ پیش کرتگ اَنت۔
آئی ءَ گوشتگ که بارکان ءَ شھید بیتگیں دومی سنگت سرمچار مستپا نور پنام ءِ زبیرجان ء نورجان تسپ پنجگور ءِ جاہ منند اِنت که آ چه دو ءُ نیم سال پیش گوں بی ایل ایپ ءَ بندوک بیتگ ، آ شال ءُ پنجگور ءِ شھری چیرجنگی کاراں بیتگ ءُ آئی ءِ لیکھی دیوان ءُ مردمانی سرپدی دیگ ءِ آشوبی کاراں جوانیں کرد پیش کرتگ اَنت ، گل ءَ آئی ءِ لیکھی کرد ءُ کاری توان دیستگ اَنت ءُ آ بارکان ءِ سنگراں دیم داتگ که آ کوه جاندر ءِ میڑ ءَ شھید بیتگ۔
جارکش ءَ گوشتگ که سیمی سرمچار سمی الله پنام ءِ میران ء نورمھمد ، جاه ملائی بازار تربت جاہ مند اِنت که آ مارچ 2024 ءَ گوں بی ایل ایپ ءَ ھوار بیتگ ، آ هم ساری ءَ تربت ءَ گوں گل ءِ شھری چیریں نیٹ ورک ءَ بندوک بیتگ که آئی ءَ بازیں ھاسیں ھال گپتگ ءُ دژمن ءِ هیله بے سوب کرتگ اَنت. چه ایشی ءَ پد بارکان ءِ کوھی اوتاگ ءَ اتکگ که جنگی سنگراں گوں تمردی ءُ دلیری ءَ وتی کرد پدر کرتگ ءُ په آجوئی لوٹوکیں پدریچ ءِ راه ءَ رژنائیں چراگ بیتگ۔
آئی ءَ گوشتگ که چارمی شھید سرمچار شاه زیب پنام ءِ شاشان ء امیر بکش گونی ، گریشگ ءِ جاہ منند اِنت. آئی ءَ اسلامی زانشجاه بھاولپور ءَ زولوجی ءَ ونتگ ءُ یک مزنیں وانندگیں سنگتے بیتگ ، آ 2023 ءِ اگست ءَ گوں بی ایل ایپ ءَ ھوار بیتگ ، وانندھی پولکاری ءُ لیکھی کاراں آئی ءِ کردانی سوب ءَ گل ءِ رسانکدری ونگ ءِ بھر جوڑ بیتگ ، دانکه 2024 ءِ نومبر ءَ اوتاگ ءَ اتکگ که آ کوه جاندر ءِ جنگ ءَ شھید بیتگ۔
جارکش ءَ گوشتگ که کوه جاندر بارکان ءَ اے مزن شانیں شھیداں ، شھید سدو مری ءِ کردانی پارست ءَ چه ٹک ءُ دمگ ءَ برزتر بلوچیت ءِ جوزگ ءُ پجار ءَ یک نوکیں توانے بکشاتگ۔
میجر گھرام بلوچ ءَ کوه جاندر ءِ میڑ ءَ شھید بیتگیں سرمچاراں ستک شانی ندر کرتگ ءُ داں بلوچستان ءِ آجوئی ءَ شھیدانی کرد ءِ برجاه دارگ ءِ کول کرتگ۔
