ڈیرہ بگٹی ءِ ھند سوئی ءَ آپ نیست ، آپ ءِ نه بوگ ءِ سوب ءَ مردماں زھرشانی ءَ روانکے کش اتگ۔ زھرشانی ءَ مردماں بازیں کچے ءَ بھر زرتگ۔ آیاں انتزامیہ ءِ نابودیانی بگیری ءَ اوگام جتگ۔
زھرشانی کنوکیں مردمانی گوشگ اِنت کہ پیرکوہ ءَ آپ نیست مردم پہ ورگی آپ ءَ تلوسگ ءَ اَنت بلے چہ سرکار ءُ ھندی انتزانیہ ءِ نیمگ ءَ انگت ءَ په مردمانی آپ ءِ جیڑھ ءَ ھچ وڑیں گامگیج زورگ نه بیتگ.
آیاں گوشتگ کہ چہ بے آپی ءِ سوب ءَ مردم چہ وتی پت ءُ پیروکی ھنکیناں لڈ ءُ بار کنگ ءَ لاچار بوگ ءَ اَنت۔ سوئی بلوچستان ءِ ھما جاہ اِنت آئی گیس ءُ آدگہ مادن کشگ ءُ پنجاپ ءُ پاکستان ءِ آدگہ استاناں برگ بوگ ءَ اَنت بلے سوئی انگت ءَ چہ بنکی آسراتی ءَ زبھر اِنت۔
آیاں گوشتگ کہ پیرکوہ ءِ بابت ءَ ھمے گوشگ بیت کہ مردمان ءَ آپ دیگ بوگ ءَ اِنت ایشی ءَ ما داد سرپد نہ بہ ایں بلکیں وتی راج ءِ کمشرپی لیک ایں۔ ما اد ءَ دگہ ھچ ءِ لوٹ ءَ کنگ ءَ نه اِیں بس آپ ءُ وتی بنکی آسراتیانی لوٹ ءَ کن ایں۔
آیاں گوں گوشتگ کہ ما چہ سرکار ءَ لوٹ کن ایں کہ پہ مئے لوٹانی منگ ءَ گامگیج بہ زور ایت۔
