کیچ: زور بیگواھیں سید جان ء ابدلھالک ءِ کھول ءَ آئی ءِ آجوئی ءِ لوٹ کُرتگ ءُ گْوشتگ کہ سید جان ھچ وڑیں سیاسی جیڑہ ءُ گلانی بھر نہ بیتگ ءُ اے گپ ءَ سرجمیں بلیدہ زانت کہ سید جان یک پُرایمنیں ورنایے بیتگ کہ آ وتی ڈگارانی سر ءَ کار کنگ ءَ بیتگ۔
کھول ءِ گْوشگ اِنت کہ چاردہ پروری ءِ روچ ءَ جھل بیگاہ ءَ یک سیاھیں کرولا گاڑی یے ءُ دو پَرپٹ اتکگ ءُ سید جان اِش آوار جتگ، اے میان ءَ گس ءِ مردماں گھگیری کنگ ءِ جُھد کُرتگ بلے زورگریں پوج ءِ مردماں تیرگْواری کُرتگ،جنین ءُ زھگ لٹ ءُ کُٹ کُرتگ، لوگ پٹ ءُ پول کُرتگ اَنت۔
آئی گْوشتگ، ھما روچ ءَ کہ برگ بوتگ،مردماں دیستگ کہ گاڑی ءُ پرپٹ بِٹ ءَ زورگریں پوج ءِ بنجل ءَ شُتگ اَنت ءُ مئے زھگ چہ ھما روچ ءَ پد بیگواہ اِنت۔
کھول ءِ گْوشگ اِنت کہ اے اولی رند نہ اِنت چیزے سال پیش ھم یکبرے پاکستانی پوج ءُ چیریں ادارھانی کارمنداں سید جان آوار جتگ ءُ بُرتگ بلے بے میار بوتگ ءُ چیزے روچ ءِ تہ ءَ یل کنگ بیتگ، اے رندی چار ماہ سرجم بیگ ءَ اِنت انگت ءَ ھچ ھال نیست کہ چون اِنت ءُ پرچہ بیگواہ کنگ بیتگ۔ ریاست کہ مردمے پہ زور بیگواہ کنت گڑا آئی ءِ میار ءَ ھم کھول ءَ بہ گْوش ایت داں کھول دلجم بہ بیت کہ منی مردم میار بار اِنت پمشکا آوار جنگ ءُ بیگواہ کنگ بیتگ۔
آئی گوں جھانی ءُ ھندی مردمی ھکانی دارہ ءُ گلاں دزبندی کُرتگ کہ پہ سید جان ءِ آجوئی ءَ توار چست بہ کن اِت کہ مارا دگہ در نیست ءُ دگہ کس مئے گپاں گوش نہ دار ایت۔
آئی گْوشتگ کہ ما دلجمیں کہ سید جان یک بےمیاریں ورنایے ءُ ناھک ءَ برگ ءُ بیگواہ کنگ بیتگ، اگاں میاربار اِنت گڑا آمیدگس ءَ پیش کنگ بہ بیت۔
