تھران: اسرائیل ءَ دوشی ادار چار ءَ ایران ءِ بنجاھی شھر تھران ءَ ارش کرتگ ءُ ارش ءِ آسر ءَ ایرانی پوج ءِ چیپ آپ سٹاپ مھمد باکری مرتگ۔
جھانی رسانکدر ءِ رد ءَ ایران ءِ بنجاھی شھر تھران ءَ دوشی چار ءِ نزیک ءَ تراکانی توار اش کنگ بیتگ اَنت۔ چہ ارش ءَ پد تھران ءِ نیمگ ءَ شنگ بیتگیں تامربنداں گندگ بیتگ ارش ءَ پد جتائیں ماڑیاں آس روک اِنت۔
اسرائیل ءِ دیمپانی وزیر ءَ ایران ءِ سر ءَ ارش ءِ گپ راست کرتگ ءُ گوشتگ کہ اسرائیل ءَ ایران ءِ سر ءَ ارش کرتگ۔
ایرانی پوج ءِ چیپ آپ سٹاپ مھمد باکری ءِ کوش ءِ گپ چہ ایرانی رسانکدر ءِ نیمگ ءَ منگ بیتگ کہ میجر جنرل مھمد باکری ایران ءِ پوج ءِ مزنیں مردمے بیتگ۔
اے بابت ءَ اسرائیلی پوج ءِ گوشگ اِنت کہ اسرائیل ءِ ارش ءِ بگیری ءَ ایران ءَ پسھی کاروائی ءَ سد ڈرون ارش کرتگ، بلے آ چہ نشانگ ءَ سر بوگ ءَ پیسر تباہ کنگ بیتگ اَنت۔
امریکی مھتر ڈونلڈٹرمپ ءَ گوں امریکی رسانکدری ادارہ پاکس نیوز ءَ وتی گلدارے ءَ گوشتگ کہ من ایران ءِ بگیری ءَ اسرائیل ءِ کاروائی ءِ شوربندی ءَ سرپد بوتگ آں، بلے امریکہ ءِ پوج ءَ اے آپریشن ءَ ھچ وڑیں کرد پیلو نہ کرتگ۔
