کیچ: مرچی پاکستانی پوج ءَ میناز بلیدہ بیڑ بُرتگ، راہ ءُ در بستگ اَنت ءُ رؤک ءُ آؤکیں مردماں جُست ءُ پُرس کنگ ءَ اِنت۔
زْرمبش جھگیر ءِ رد ءَ پاکستانی پوج مردماں دارگ ءُ آیانی موبائلاں چارگ ءَ اِنت۔ چہ ایشی ءَ رؤک ءُ آؤکیں مردم پریشان اَنت۔
ھندی مردماں گوں زْرمبش ءِ اھوالکار ءَ ھال کُرتگ ءُ گْوشتگ کہ زورگریں پاکستانی لشکر ءَ دیر اِنت کہ بلیدہ ءِ جتاجتائیں جاگھاں بیڑ بارت، لوگانی سر ءَ اُرش کنت، راہ ءُ دراں بند ایت ءُ مردماں دلسیاہ کنت۔ بلے چیزے روچ بیت کہ مدام ھمے وڑ کنگ ءُ مردماں پریشان کنگ ءَ اِنت۔ دومی نیمگ ءَ زورگریں لشکر ءِ جوڑ کُرتگیں ھندی کشندہ ٹولی ھم شپاں راہ ءُ دراں بند کن اَنت ءُ مردمانی موبائل ءُ زراں بَرگ ءَ اَنت۔
سرجمیں بلوچستان ءَ زورگریں پاکستانی پوج ءِ زوراکی یکشل ءَ برجاہ اَنت۔ ھمک روچ بےمیاریں مردمانی آوار جنگ ءُ بیگواہ کنگ ءُ بیگواھیں مردمانی لاش دزکپگ ءَ اَنت۔ ایوک ءَ گْوستگیں ماہ ءَ بلیدہ ءَ زورگریں لشکر ءُ آئی ءِ کشندہ ٹولی ءِ نیمگ ءَ کساس ھپت ھشت ورنا شھید کنگ بیتگ۔ چہ رمزان ءِ ماہ ءَ داں انوں کساس دہ ءَ گیش ورنا آوار جنگ ءُ بیگواہ کنگ بیتگ کہ انگت بیگواہ اَنت۔
