آواران: جاھو ءَ پاکستانی پوج ءِ نیمگءَ جتا جتائیں ھنداں زوراکی برجاہ اِنت۔
زرمبش جھگیر ءِ رد ءَ پاکستانی پوج جاھو ءِ میتگ کوھڑو، گزی، داروکوچگ، نرمگی، چھبی، کورک ءِ کِر ءُ کشانی مردماں وتی بنجل ءَ لوٹائینگ ءُ تنگ کنگ ءَ اِنت۔ پوج ءَ جاھو ءِ لوکل گاڑیاں ھوار پیماز بروکیں گاڑی ھم داشتگ اَنت ءُ گاڑی واھند ءُ ڈرائیور کڈن کرتگ اَنت کہ آ پہ دکانداران راشن میار اَنت۔
چار روچ پیش پاکستانی پوج ءَ کورک ءَ گاڑی ڈرائیورے سکا آزار داتگ ءُ گوں ٹپی ئیں جاوراں یل داتگ۔ کورک ءَ پاکستانی پوج ءِ دست ءَ جنینانی ھم لٹ دیگءِ ھال اِنت۔ چہ کورک ءُ نوندڑ ہ ءَ پاکستانی پوج ءَ سے یا چار ورنا آوار جتگ کہ آ انگت ءَ پجارگ نہ بیتگ اَنت پہ آیانی بابتءَ مئے گیشیں جستءُ پرس برجاہ اِنت۔
ھندی مردمے ءَ گوں زرمبش ءَ رھوت کرتگ ءُگوشتگ کہ چہ پوج ءِ نیمگ ءَ گاڑیانی بند کنگ ءُ ھمک روچ ءَ مردمانی پوج ءِ بنجل ء لوٹائینگ ءَ مردم سکا دلسیاہ اَنت۔ پاکستانی لشکر ءِ نیمگ ءَ ھمے زوراکیانی میان ءَ گوستگیں روچاں کوھڑو ءَ چھبی ءِ جاہ منندیں درمان نامیں ورنایے شھید کنگ بیتگ اَت۔ چہ آئی پد ھم چھبیءَ پاکستانی پوج ءِ بیڑ برگ ءِ میان ءَ امام بکش نامیں مردمے بیران بیتگ آ ھم پوج ءِ زوراکی زانگ بیت۔ چی ءَ کہ پاکستانی پوج ءَ آئی کستریں برات ءِ آوار جنگ جھدکرتگ گڑا مردم گِر ءُ چیل بیتگ اَنت آیاں ورنا ءِ برگ نہ اشتگ ھمے میان ءَ امام بکش ءَ دل ءَ گپتگ ءُ آ بیران بیتگ۔
آئی ءِ گوشگ اِنت کہ چہ پوج ءِ نیمگ ءَ لوکل گاڑیانی بند کنگ ءُ راشن ءِ دارگءَ ھندی مردم سکا جنجالانی دیمپان اَنت۔
