بلوچ یکجہتی کمیٹی ءِ بنجاھی جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ شال ھدہ زندان ءَ انوں آرگ بیتگیں سپرنٹنڈنٹ سید ھمیداللہ پیچھی مدام بلوچ یکجھتی کمیٹی ءِ کارکناں ترسینگ ءُ دلسْیاہ کنگ ءَ اِنت۔
آئی گوشتگ کہ سپرنٹنڈنٹ سید ھمیداللہ پیچھی تیوک ءَ سْیاسی بندیگانی کانودی ءُ انسانی ھک ءَ نہ منّگ ءَ انت بلکیں یک زوراک ءُ بدکرداریں کارےکنگ ءُ بی وائی سی ءِ سروکاں جتاھیں رنگ ءَ سسائی ءُ جانی آزارانی نشانگ کنگ ءَ اِنت ءُ مئے سروکانی کھولاں ھم مدام ترسینگ ءَ اَنت گوں آیانی آزیزاں گند ءُ نند ءَ داں سَے اداراں زندان ءِ ڈنا ودار پرماھگ ءَ اِنت۔
آئی گوشتگ کہ بی وائی سی ءِ سروک بیبگر بلوچ ءُ شاہ جی بلوچ ءَ یک جتاھیں کوٹی یے ءَ بند کرتگ کہ اود ءَ آ چہ الاج ءُگوں کھول ءَ گند ءُ نند ءُ آدگہ بنکی ھکاں زبھر اَنت۔ وھدے کہ اے زوراکیانی بگیری ءَ توار چست کرتگ سپرنٹنڈنٹ سید ھمیداللہ پیچھی ءَ گوں آیاں زوراکی کرتگ ءُ آزار دیگ ءِ جھد کرتگ۔ بیبگر بلوچ یک نادراھے ءُ آ مدام چارگ ءُ درمان کنگ لوٹ ایت بلے زندان ءِ انتزامیہ اے آسراتیانی دیگ ءَ جاڑیگ نہ اِنت
آئی گوشتگ کہ ھمے وڑ ءَ بی وائی سی ءِ بنجاھی آرگنائزر ڈاکٹر ماہ رنگ بلوچ ءُ آئی ھواربندیگیں بیبو بلوچ ءُ گلزادی بلوچ ءَ ھم مدام ترسینگ ءَ اِنت سپرنٹنڈنٹ ءَ جنینانی سر ءَ پابندی گیش کرتگ ءُ وھدے کہ آیاں پہ وتی بنکی ھکاں توار چست کرتگ آ بیھار داتگ ءُ دلسْیاہ کرتگ اَنت۔
جارکش ءَ گوشتگ کہ زندانءِ انتزامیہ ءُ سپرنٹنڈنٹ ءَ کڈن کن ایں کہ آ زوت بی وائی سی ءِ سروکانی ترسینگ ءَ بند بہ کنت ءُ آیانی کانودی ءُ انسانی ھک دیگ بہ بنت۔ ما اے زوراکی ءِ بگیری ءَ ھچ وڑ ءَ بے توار نہ بہ ایں۔
