بلوچ اسٹوڈنٹس آرگنائزیشن ءِ جارکش ءَ وتی شنگ کرتگیں درشانے ءَ گوشتگ کہ یازدہ جون بلوچ راجی گوستانک ءِ تہ ءَ یک مزن ءُ یاتگیری روچے کہ شھید ھمید بلوچ ءَ زورگر ءِ زوراکی ءُ لُٹ ءُ پُلیں توانمندانی بگیری ءَ بے مٹیں جھد ءَ جان ءِ دیمونی داتگ۔ بی ایس او شھید ھمید بلوچ ءَ آئی شھیدی ءِ چل ءُ چارمی سالروچ ءَ ستک شانی نَدْر کنت ءُ آئی جھد ءُ لیکہ ءَ پہ بلوچ ورنایاں مادنیں راھے لیک ایت۔
آئی ءَ گوشتگ کہ شھید ھمید بلوچ یک لس نودربرے نہ بوتگ، بلکیں آ زانوگر، مھکمیں لیکہ ءُ بے مٹیں دیمونی دیگ ءِ چیدگ بیتگ۔ 1979 ءَ وھدے کہ اُمان ریاست ءَ بلوچانی سر ءَ سکا زوراکی کرتگ ءُ بلوچ ھنداں پہ اُمان ءِ پوج ءَ زور بھرتی کنگ ءِ درچ بندات کرتگ گڑا ھمید بلوچ ءَ بی ایس او ءِ راھبند ءَ ھمے زورگری پندلانی بگیری ءَ شریں وڑے ءَ توار چست کرتگ۔ آئی ھمے توکل ءَ زوراک پروش داتگ اَنت ءُ ھمے سوب ءَ 1981 ءَ دروگیں کیس ءَ پاھو ءِ سزا دیگ بوتگ۔ بلے شھید ھمید بلوچ کدی ھم پہ لُٹ ءُ پُلیں توانمنداں میاربار نہ بوتگ، آ پہ بلوچ راج ءَ یک لیکھی مجاھد، راجی بامرد ءُ آجوئی جھد ءِ روکیں چراگ بوتگ۔ آئی شھیدی ءِ دیمونی، راھبند دوستی ءُ گھگیری ءِ انچیں کسھے بیتگ کہ مرچی ھم بلوچ راج ءِ مادنیں راہ اِنت۔
جارکش ءَ گوشتگ کہ شھید ھمید بلوچ ءَ وتی جان ءِ دیمونی داتگ ءُ نہ تھنا بلوچ ورنا باسما کرتگ اَنت، بلکیں یک کلوھے داتگ کہ بلوچ راج نہ بھا زورگ بیت ءُ نہ سر جھل کنت، نہ دارگ بیت۔ آئی میارباری ھمے بوتگ کہ آ بلوچ راج ءَ نوآبادیاتی درچ ءُ ڈنی پندلانی بگیری ءَ پاد کنگ ءَ بیتگ۔ آئی شھیدی ءَ بلوچ راج ءَ را نوکیں ارواھے بکش اِتگ ءُ ھمک بلوچ ءِ دل ءَ گھگیری ءِ جوزگ ودی کرتگ۔
آئی ءَ گوشتگ کہ بی ایس او وتی اے مزن نامیں شھید ءِ دیمونیاں ستک شانی نَدْر کنت ءُ ھمے کول ءَ کنت کہ شھید ھمید بلوچ ءَ ھوار درسیں بلوچ شھیدانی ھون زوال نہ بنت۔ ما گوں زانشت، گل ءُ یکشلیں گھگیری ءِ رد ءَ وتی شھیدانی واھگاں پیلو کن ایں۔ شھید ھمید بلوچ ءِ لوٹ پما رھشونی کنت ءُ ما آئی کاروان ءَ داں گڈی آسر ءَ سر کن ایں۔
