ایمنسٹی انٹرنیشنل زرباری ایشیا ءَ بلوچستان ءُ چہ پاکستان ءِ آدگہ ھنداں بلوچ نودربرانی یکشلیں زوریں بیگواھیانی سر ءَ بژن درشان کرتگ ءُ گوشتگ کہ بلوچ نودربر گوں تیزی ءَ نشانگ کنگ بوگ ءَ اَنت اے انسانی ھکانی گنتریں لگتمالی اِنت۔
آئیءَ گوشتگ کہ بلوچستان زانشتجاہ ءِ نودربر ماہ جبین 29 مئی 2025 ءَ بیگواہ کنگ بیتگ، چہ آئی پیش 24 مئی ءَ آئی برات یونس بلوچ لشکر ءَ پہ زور بیگواہ کرتگ۔
گل ءِ گوشگ اِنت کہ شال ءَ چہ زھرشانی کنوکاں پد ریاستی ادارھانی نیمگ ءَ بلوچ نودربرانی بگیری ءَ زوراکی تیز کنگ بیتگ۔ اے زھرشانی کنوکانی تہ ءَ ڈاکٹر ماہ رنگ بلوچ دزگیر کنگ بیتگ، کراچی زانشتجاہ ءِ کانود ءِ نودربر جاوید بلوچ 23 اپریل ءَ پولیس ءُ سی ٹی ڈی ءِ بیڑ برگ ءَ پد بیگواہ اِنت ءُ دگہ یک نودربرے گھرام اسھاک 24 اپریل ءَ چہ شال ءِ سول نادراھجاہ ءِ دیم ءَ آوار جنگ بیتگ، اے درسیں مردمانی انگت ءَ ھچ وڑیں ھال نیست۔
ایمنسٹی انٹرنیشنل ءَ گوں پاکستان سرکار ءَ لوٹ کرتگ کہ اے زوریں بیگواھیانی زوت ءُ سرجم ءَ شریں وڑے ءَ پٹ ءُ پول کنگ بہ بیت۔ بیگواھیں بلوچ نودربراں در بہ گیج ایت ءُ آیاں زوت یل بہ کناھین ایت۔
آئی ءَ گوشتگ کہ زوریں بیگواھی میان استمانی انسانی ھکانی کول ءِ بگیری اِنت ءُ اے زوت دارگ بہ بیت۔
