بلوچ وومن پورم ءِ سروک ڈاکٹر شلی بلوچ ءَ ائید ءِ درگتءَ وتی شنگ کرتگیں تامربندے ءَ گوشتگ کہ مرچی سرجمیں دنیا ءَ اسلامی ملک ائید ءِ شاتکامی ءَ کنگ ءَ اَنت بلے بلوچ ءِ ائید گار ءُ بیگواہ اِنت ءُ ریاستی زندانانی تہ ءَ آزار سگگ ءَ اِنت، بلوچ راج ءَ پہ وتی گار ءُ بیگوائیں پُسگانی آجوئی ءَھمک ھما در ٹک اتگ کہ اودا ءَکسانیں اُمیتے بیتگ ، بلوچ ءِ ائید ھما روچ ءَ بیت وھدیکہ سرجمیں بلوچ پُسگ چہ استانی زنداناں آجو بہ بنت ءُ اے زلم ءُ زوراکیانی بگیریءَ ما داں ھما وھدا اوشت ایں وھدیکہ یک بلوچ پُسگے ریاستی زندانانی تہ ءَ بہ بیت۔
آئی ءَ گوشتگ کہ گار ءُ بیگواھی ءُجنگ ءُ کُشگ ءِ درچ بلوچستان ءِ تہ ءَ ھما وھد ءَ بندات بیت کہ بلوچ ءِ جھد وتی گڈی آسرءَ سربیت گڑا ریاست ءَ اے اوپار نہ بیت گڑا آ وانندگیں سرانی گار ءُ بیگواہ کنگ ءَ بِندات کنت ، اے ھما دور بیت کہ اگاں یک ورنا یے دست ءَ بلوچی کتابے ھم بوت۔ وھدے کہ ھاسٹلاں چھاپہ جنگ بیت اگاں چہ ھما کمرہ ءَ کتاب در اتک گڑا آئی ءِ ژانگوالیں کُنٹ کوہ ءُ گیابانی تہ ءَدست کپ ایت۔ ھمے رنگ ءَ تا شاد ڈگری کالج ءِ ھاسٹل سیل جنگ بیت ءُ کتاب سوچگ بنت ، اے جنگ ءُ کُشگ ءِ درچ ھمے رنگ ءَ برجاہ بیت ،ریاست ءِ اولی نشانگ راجی زرمبشت ءِ سروک واجہ گلام مھمد ،لالا منیر ءُ شیر مھمد بنت کہ آیانی ژانگولیں کنٹ مرگاپ ءَ دور دیگ بنت۔گڑا دیمترا گار ءُ بیگواھی ءُ جنگ ءُ چگل دیگ ءِ پالیسی ءِ تہ ءَ گیشتر تیزی آرگ بیت ءُ مزنیں کریک ڈاؤنےبلوچ ءِ تھریک ءِ سرا ءَلگگ ءَ پد یک ترس ءُ بیم ءِ ماھولے ودی بیت ءُمزنیں بے تواری یے گَندگ ءَ کیت، پدا انچیں دورے کیت مردم گپ جنگ ءُ بلوچی کتاب ءِ دست ءَکنگءَ ترس اِت اَنت ، بلے ملکناز ، ھیات ءُ بانک ءِ نمیرانی ءَ پد. مزنیں زرمبشتے چست بوت آ ترس کہ مھلوک ءِ زھن ءِ تہ ءَ مان جنگ بوتگ اَت آ مھلوک ءَ پروش دات ءُ پدا زوراکی ءِ بگییری ءَ یکمشت بیت اَنت ۔
ڈاکٹر شلی بلوچ ءَ گوشتگ کہ گلیں بلوچ راج استان کدی مرد ءُ جنین ءِ بنیات ءَ ترا گار ءُ بیگواہ نہ کنت بلکیں آ مردین ءُ جنیناں یکیں چم ءَ چار ایت، ھما زالبول ءُ مردین کہ آگوں بلوچ جھد ءَ بندوک اَنت ءُ آیانی تہ ءَ زانت ھست گڑا آ ریاستی زوراکی ءِ آماچ بنت، چوش کہ اسما،ھبیبہ، رشیدہ، ماھل ءُ مرچی ماہ رنگ ،بیبو ،گلزادی ءُ ماہ جبین ریاستی زندانانی تہ ءَ آزار سگگ ءَ اَنت، ماہ جبین پولیو ءِ نادراہ اِنت آ شپ ءِ سے بج ءَ چہ سول نرسنگ ھاسٹل بیگواہ کنگ بیت، بلوچ زالبول ننگ ءُ ناموس ءِ نام نہ انت بلکیں مزاھمت ءِ راستیں دروشم اِنت۔ بلوچ راج ءَ را ریاستی پندلانی آماچ بوگی نہ اِنت ۔بلکیں اے جاورانی تہ ءَ یکجاہ ءُ یکمشت بوگی اَنت۔ انچوش کہ واجہ سبا گوش ایت یکے ءِ پتر ءَ گوات بارت گڑا مارا درستاں یکیں پترءَ بوگی اِنت ءُ زوراکیءِ بگیری ءَ توار چست کنگی اِنت۔ مارا بے توار بوگی نہ اِنت بے تواری مرگ ءِ چیدگ اِنت ،اگاں ما مرچی بے توار بوت ایں گڑا آؤکیں پدریچ مارا کدی ھم ماپ نہ کنت ۔
آئی ءَ گوشتگ کہ مرچی بیگاہ ءِ سے ءَ وی بی ایم پی ءِ نیمگ ءَ شال پریس کلب ءِ دیم ءَ پہ گار ءُ بیگوائیں بلوچ اوبادگاں زھرشانی یے بوگ ءَ اِنت الم بھر بہ زور اِت ما چہ وتی بسات ءَ پہ بلوچ جھد ءَ ھرچی کہ کت کن ایں گڑا بہ کن ایں بلے بے توار مہ بئیں۔
