بلوچ یکجھتی کمیٹی ءِ سروک ءُ زوربیگواھیں ڈاکٹر دین مھمد ءِ جنک سمی دین ءَ وتی شنگ کرتگیں درشانے ءَ گوشتگ که پاکستان ءَ ھوارسرجمیں جھان ءِ آدگه مسلمان گوں شرپ ءُ مھذبی جوزگ ءَ آئید کنگ ءَ اَنت بلے بلوچستان ءِ مردم اے روچ ءَ وتی گساں نشتگ اَنت ءُ په وتی زوربیگواھیں آزیزانی چه آزارجاھاں واتر بوگ ءِ ودار ءَ اَنت۔
آئی ءَ گوشتگ که کسے پہ وتی لوگواجہ، کسےبرات ، کسےبچ، لھتیں جنک وتی پت ءِ په زندگ ءُ سلامتی واتر بوگ ءِ اوستءَ نشتگ اَنت، اے رند ءَ یک گھارے گوں وتی برات ءَ ھوار زوربیگواه کنگ بیتگ که آ انگت ءَ بیگواه اَنت۔
سمی دین ءَ گوشتگ که بی وائی سی ءِ سروک تھری ایم پی او ءِ رد ءَ بندیگ اَنت ، ھر نیمگ ءَ پریشانی اِنت ءُ ھمک دومی گس په وتی آزیزانی آجوئی ءَ گمیگ اِنت۔
آئی ءَ گوشتگ که من سمی دین ءَ گوشتگیں شانزدہ سال اِنت که په وتی زاربیگواھیں پت ءِ شوھاز ءَ جھد کنگ ءَ آں، بیت کنت نه نوں بلکیں شموشتگ که ائید ءُ آئی ءِ شاتکامی چی یے۔
سمی دین ءَ گوشتگ که بلوچستان سچگ اِنت ، ژانگولیں لاشانی ءُ دروگیں میڑانی درچ چه 2014 ءَ پد یکبرے پد ءَ بندات بیتگ ، انوگیں ھاکماں ناشریں کانودے جوڑ کرتگ که اے زوربیگواھیاں کانودءِ رنگ ءُ دروشم داتگ۔
آئی ءَ گوشتگ که ھمایاں بلوچستان اِے جاه ءَ سر کتگ ، اے ٹپانی درمان کنگ ءِ جاه ءَ ٹپاں نوک کنگ ءَ اَنت۔
