مستونگ ءِ جاہ منند سئید منزور شاہ ءَ پنچ شمبے ءِ روچ ءَ سراوان پریس کلب مستونگ ءَ پریس کانپریس کرتگ ءُ گوشتگ کہ گوستگیں روچاں لکپاس ءِ نزیک ءَ پاکستانی پوج ءَ تیرگواری کرتگ ءُ منی زھگ کشتگ۔
آئی ءَ گوشتگ کہ منی زھگ سئید اھسان شاہ ءِ کشندھانی بگیری ءَ کاروائی کنگ ءُ مئے گون ءَ انساپ کنگ بہ بیت۔
سئید منزور شاہ ءَ گوشتگ کہ منی زھگ دو جون ءَ پہ آئید ءَ سامان زورگ ءَ شال شتگ ءُ اود ءَ وتی سیادانی کِر ءَ داشتگ ءُ دومی روچ ءَ مستونگ ءَ آھگ ءَ بیتگ کہ من ءَ شپ ءَ انتزامیہ ءَ رھوت کرتگ ءُ گوشتگ کہ تئی زھگ دگ ویلے ءَ ٹپی اِنت۔ وھدے کہ من اود ءَ شتگ آں گڑا سرپد بیتگ آں کہ منی زھگ ایپ سی ءَ تیرگواری کرتگ ءُ کشتگ۔
آئی ءَ گوشتگ کہ منی ورنائیں زھگ راہ ءَ روانی ایپ سی ءَ شھید کرتگ من ءَ انساپ لوٹ ایت۔
