کیچ: پاکستانی پوج ءِ دست ءَ زور بیگواہ کنگ بیتگیں مردمانی کھولاں زھرشانی ءَ بالگتر، نلی ءَ سی پیک دگ بند کرتگ ءُ نشتگ اَنت۔ زھرشانی ءَ جنین ءُ زھگاں ھوار مردماں بازیں کچے ءَ بھر زرتگ۔
زرمبش جھگیر ءِ رد ءَ زھرشانی جاہ ءَزور بیگواھیں سادک ء واجداد، پیرداد ء ھکیم ءُ سلال ء رپیک ءِ کھول نشتگ اَنت۔ سادک ءُ پیرداد 14 مئی 2025 ءُ سلال ءِ رپیک 29 اپریل 2025 ءَ آوار جنگ ءُ بیگواہ کنگ بیتگ۔
آیاں تران کرتگ ءُ گوشتگ کہ سلال ءَ ماھے ءُ ھپت روچ بیت بیگواہ اِنت ءُ ساک ءُ پیرداد ءِ زوریں بیگواھی ءَ بیست روچ اِنت بلے مئے مردمانی بابت ءَ مارا ھچ وڑیں سرپدی دیگ ءَ نہ اَنت۔
آیاں گوشتگ کہ چہ ایشی ءَ پیش ھم ما زھرشانی ءَ سی پک دگ بند کرتگ ءُ نشتگ ایں سرکار ءَ مارا رد داتگ ءُ گوشتگ کہ شما وتی زھرشانی ءَ ھلاس بہ کن اِت شمئے مردم باندا بیگاہ ءِ چار ءَ یل کنگ بنت بلے آ وھد شتگ مئے مردم انگت بیگواہ اَنت۔
آیاں گوں سرکار ءَ لوٹ کرتگ ءُ گوشتگ کہ مئے بیگواھیں آزیز سادک، پیر داد ءُ سلال ءَ زوت آجو بہ کنت۔ دانکہ سرکار مئے مردماں میار ایت ءُ یل مہ کنت ما وتی زھرشانی ءَ ھچ وڑ ءَ ھلاس نہ کن ایں۔
بنشون ءِ رد ءَ پاکستانی پوج ھوشاپ ءُ سھاکی ءَ گاڑیاں دارگ ءُ روگ ءَ نیلگ ءَ اِنت۔
