بلوچستان: چہ جتاھیں دمگاں پاکستانی پوج ءِ دست ءَ زوربیگواہ کرتگیں شازدہ مردم آجو بوتگ۔
اھوالکار ءِ رد ءَ چہ کیچ ءِ ھند تُربَت ءُ ناسرآباد ءَ زوربیگواہ کرتگیں شش مردم آجو بوتگ کہ آیانی نام انزمان ھسن ء مھمد ھسن، جھمنند ناسر آباد، ابدُلمجید ء ابدُلگنی جھمنند بلیدہ، گلام کادر ء دوست مھمد جھمنند بلیدہ، دلسرد ء مھمد ھسین جھمنند آسکانی بازار آپسر، ذاکر ء ھیدر جھمنند آسکانی، زید ء ملا ابداللہ سلالہ بازار تربت ءِ جھمنند اِنت، ایشانی آجوئی ءِ گپ انسانی ھکانی گل بلوچ یکجھتی کمیٹی ءُ آیانی کھولاں راست کرتگ اَنت۔
بلوچ یکجھتی کمیٹی ءِ رد ءَ ھزدار ءِ ھند نال ءَ زورگریں پاکستانی لشکر ءِ دست ءَ یکیں روچ ءَ زوربیگواہ کرتگیں ممتاز الی ء مھمد اسمائیل شاھوانی، وزیر اھمد ء رھمت اللہ، اکبال ء گلام رسول شاھوانی، نزیر اھمد ء رھمت اللہ، لیاکت الی ء مھمد انور شاھوانی، ھکمت اللہ ء ازیز اللہ اِنت کہ چہ آیاں دو مردم نوہ مئی ءَ آجو بوتگ ءُ آدگہ چار مردم 23 مئی ءَ آجو بوتگ ءُ وتی گس ءَ سر بوتگ اَنت۔
بی وائی سی ءِ رد ءَ چہ گْوادر ءَ 12 مئی 2025 ءَ زوربیگواہ کرتگیں شئیب ء رپیک بلوچ کہ ٹی ٹی سی کالونی گوادر ءِ جھمنند اِنت 30 مئی ءَ آجو بوتگ ءُ وتی گس ءَ سر بوتگ۔
ھمے وڑ ءَ شش اپریل ءَ چہ موسا کیل ءَ زوربیگواہ کرتگیں زپر بزدار ء ھان مھمد ءُ آپاک بزدار ء ایوب بلوچ آجو بوتگ ءُ وتی گس ءَ سر بوتگ اَنت۔
دومی نیمگ ءَ چہ مَشکے ءَ 29 نومبر 2024 ءَ پاکستانی لشکر ءِ دست ءَ زوربیگواہ کرتگیں بیاندُر بلوچ ء مرید ھان 1 جون 2025 ءَ آجو بوتگ ءُ وتی گس ءَ سر بوتگ۔
